NPF-i tiyazü ocet zülur Jaideep Mazumdar aitsür

Dimapur, Rongchii (April) 4 (TYO): Jaideep Mazumdar ta ser nisung kati online news portal Swarajyamag.com nung NIA-i kiralongrar nem sen agütsüba ken o bushisüngdangba nung Arogo, sorkar ketdangsertem aser NPF party den lennirtemi telungpur telok ka nem sen agütsüba bushitet ta züluba ocet aitsür ta Naga People’s Front, Central Headquarters-i sangdong ka nung metetdaktsü.
NSCN (K) tenüng nung tax saruba mapa nung NPF lennir TR Zeliang-i shilem agiba NIA-i bushitetogo ta Jaideep Mazumdar-i shia alibaji khenyongi magizüker, kechiyong bushisüngdang ano metembangdang yongi iba ocet züluri tai maketba nisung ka aitsütsü merangogo, ta parnokisa ashi.
TR Zeliang-i NSCN (K) den tesentaktep ayuba ajanga BJP-i NPF den tesentaktep pila aser NDPP den aden ta iba ocet zülurisa shia lir aser iba ya ajanga pai Tsüklai (February) 27 nü Nagaland assembly election agiba osang tejangja memetetba sayur, ta NPF sangdong nungsa metetdaktsü.
Iba ocet zülur aser Swarajyamag.com news portal-i NPF aser lennirtem tenüng menüktsütsü atema tebilemba aliba sayur aser iba atema sasa bilemtsür. Ajisüaka, ano kanga tesempatsü aketba osang kaji, iba ocet züluri Nagaland nung Arogotemi telungpur teloktem atema tax sarur aser Tsüngrem mapa inyaktsü atema sen aika miimzüka ayur ta ashiba lir. Iba ya kanga dang temenünütsüka lir, ta NPF-isa ashi.
Nagaland nung Arogoi telungpur teloktem sabang ka nung longjemer India sorkar den yimjung olemtep alitsü atema kanga meranga mapa inyaker aser küm aika Arogoi yimjung aser tensa süngjemtsü atema tanen maka inyaka aruba osang iba ocet züluri jungjunga metettsüla ta NPF-i metetdaktsüogo.
Naga People’s Front indang omenji Fide Non Armis (By Faith, not by Arms) lir aser iba nung ajemdaker NPF-i tashiyim melii mapa inyaker aser mangatettep aliba onüktem timi dang angatetteptsü atema inyaker. Anungji, Jaideep Mazumdar-i Nagaland indang temetettsütem jungjunga metettsü merangtsüla. Iba news portal nung pa ama osang junga memeteter ka Associate Editor inyakdaktsüba ajanga iba news portal ajanga tiyazü osangtem prokshiba tali jungkai adoka sayur, ta NPF-isa ashi.