Kobi melii linük nübur ajaki BJP sendoktsü: Chandrababu Naidu

New Delhi/Amaravati, Rongchii (April) 06 (Agencies): Tanü TDP Tir, Chandrababu Naidu-i party MP tem dang Andhra Pradesh atema maongka balaka asoshi tesashiba longkak aitang, ta metetdaktsü.
TDP MP tem den telephone-conference ajanga jembidang Naidu-i, “Anogo aika Parliament senden thinenba ajanga BJP-i jena aoer. Parliament senden anenra MP temi Tir ajurutsüla. BJP-i lemsar yimsüsüba inyakyim inyaker,” ta ashi.
Tanep Amaravati nung Andhra Pradesh chief minister aser TDP tongti, Naidu lenisüba nung par minister tem aser TDP MLA temi cycle rally ka ayongzüka Centre anema longkak aita liasü.
Kobi melii linük nübur ajaki BJP sendoktsü, ta Chandrababu Naidu-i ashi.
Naidu-i sangdong ka ajanga, “Andhra Pradesh nüburtemi BJP sendok tenzükogo. Kobi melii linük tesem kecha nunga nüburtemi BJP magizüktsü,” ta metetdaktsü.
“Special Category Status aser AP Reorganisation Act nung telatetbatem densema tenangzükba balala mataloktsü tashi onoki matsüngshitsü,” ta paisa ashi.
YSR Congress MP temi yashi longkak aitba sentong nung shilem magiba dak sendakba nung tasüngdangba ka langzüdang Naidu-i, ibaji party politics nung asalentong tamajung tatishitsü ka lir, ta ashi.
Pai, “Tesüiba mapang nung lisopur kari British nunger den longjemer asalentong tamajung yanglua liasü. Iba denji kasa YSRCP-ia Centre den longjemer asalentong tamajung yanglur,” ta aitsü.
Yashi TDP MP temi Rajya Sabha chamber nung longkak aita liasü aser nikongdang 2:30 nung senden tembangba sülena house toktsür aotsü memelung. Tesüsa aonung 8:15 ako meta züngsemtemji meindoka liasü.