ATM nung auyaba ken o nung nisung pongu apu

Itanagar, Rongchii 06 (Agencies): ATM nungi sen lakh 50 auyaba ken o nung ajemdaker Itanagar nung police temi nisung pongu apu.
“Naharlagun PS indang OC N Riba, Naharlagun SDPO M BUI aser Capital Complez SP Sagar Singh Kalsi nunger ketdangsüba kübok SI K Dev-i aniba police telok kati iba ken o nung sendakba document tem asadanga aser medemdanga reprangogo,” ta police department ajanga Yangtepnü sangdong ka nung ashi.
SI K Dev-i aniba police telok yagi Assam nungi Bultan Boruah, Nabakrishna Gogoi aser Indrajit Barhoi apu. “Par asem kübok iba tesem nung ATM tem ya yua liasü aser item ATM nung sen inoktsütsü ya parnok mapa,” ta kasa sangdong ajanga ashi.
Iba ken o dak sendaktepa police temi Guwahati nung aliba Radiant Cash Management Service AGM, Sultan-Al-Mahmud aser assistant manager Porakmoni Das puogo.
Police temi sen lakh 13 ngutet aser iba sen ya ken o nung aija alirtemi Assam nung yua liasü.
Naharlagun tesem nung aliba SBI ATM balala nung sen lakh 50 tashi samaba ajanga Radiant Cash Management Services nungi risk manager, Nazirul Islam-i FIR ka benokba sülen Naharlagun police station nung ken o ka züluok, ta police ajanga ashi.