MLA tem itasen tutsütsü asoshi Assam sorkari benok

Guwahati, Rongchii 06 (Agencies): Yangtepnü Assam sorkari legislator tem indang itasen timba kümtsütsü asoshi benoka jembi aser iba ya sen 20,000 nungi 40,000 tashi lir. 2014 sülen MLA tem atema itasen ya tan agi tanaben tutsür.
Legislator temi parnok itasen timba akümtsü asoshi benoka jembitsü melena tanbo assembly speaker-i pay commission ka shim.
Taoba Chief Secretary, PP Verma tekolak sür züngsem asem agi akümba pay commission ka ajanga benokba ya state cabinet-i Rasemnü agizük aser Yangtepnü house nung bill kümer table asü.
Chief minister indang basic salary ya ita shia sen lakh 1.3 akümtsü (allowance maden), aser iba ya tang ita shia sen 90,000 aliba nungi sen 40,000 temloktsü. Chief Minister indang itasen nung tali temloktsüba ya 2010 nunga liasü, aser iba mapang sen 16,000 nungi 65,000 kümtsü. Chief Minister indang ita shia basic salary agi züngdangba trok nung kongshitsü ya küm 60 agi, aser 1958 küm Assam Chief Minister indang basic salary ya ita shia sen 1000 liasü, ta osang ajanga ashi.
Chief Minister sülen itasen timtiba angur ya assembly speaker lir aser speaker indang itasen ya tang sen 80,000 aliba nungi sen lakh 1.2 agütsütsü benoka lir.
Assembly züngsemtem itasen timtiba agir jenjang asembuba nung opposition lenir aser cabinet minister tem lir, aser parnok ya ita shia sen lakh 1.1 angutsü lir, koba tang sen 80,000 angur.
Tang benoka aliba nung minister of state indang itasen ya sen 75,000 nungi sen lakh ka kümtsütsü aser tanüngba legislator ajak nem sen 20,000 inoksemja itasen 70,000 angutsü.
Basic salary yanglushiba den külemi house committee ajanga tang aser taoba MLA tem asoshi allowance balala nung sen timba kümtsütsü atema benok. Item allowance ya chief minister, speaker, deputy speaker aser minister ajak dak kongshitsü.