Defence ministry website hack asü; Home Ministry website shibang

New Delhi, Rongchii (April) 06 (Agencies): Tanü Defence Ministry indang website ‘hack’ asüba sülen tekümdangtsü atema mera ka agia Home Affairs Ministry-i parnok indang website shibangogo.
Sorkar otongdar kati, security upgrade asütsü atema Ministry of Home Affairs indang website shibanga atar, ta metetdaktsü.
Sorkar indang websites timbaka upgrade sütsüba- Nation Informatics Centre (nic)-i MHA indang website security upgrade sütsütsü.
Home Ministry indang website nungji, “Website off-line nung lir. Technical timtem kar ajanga iba website mangutsü. Ano khen merangdangang. Tangatetba tajung atema pelar,” ta ashir.
Otongdarisa, tekümdangtsü mera agia iba telemtetba agiogo, ta metetdaktsü.
Tanü nikongdang Ministry of Defence indang website hack süa liasü. mod.gov.in website nungji error message ka aru aser temalenji China nunger zülujang kar mesüka adok, aser ibaji ajanga China nungeri cyberattack asü südi ta melung malemer.
Union Defence Minister, Nirmala Sitharaman-ia, lar ministry indang website hack süogo, aser tarutsü nungbo iba ama tanaben mataloktsü atema mera kar agia inyaktsü, ta metetdaktsü.
“Website hack asüba sülen mera kar agia inyakdar. Kobi melii iba website restore asütsü. Tarutsü nungbo item ama mataloktsü atema akokba tashi inyaktsü,” ta lai twitter ajanga metetdaktsü
Taonung 7:00 ako tashi nunga MoD website shibanger liasü.