Manipur nung nisung 3 kahset; Mapang tatakzük melii curfew alitsü ozüng agütsü

Churachandpur, September 01 (Agencies): Manipur nung bill tasen asem benokba atema lungkak aitba mapang nisung asem süogo aser ibaji ajanga Manipur rangben nung mapang tatakzük melii curfew alitsü sangdongogo.
Tang tashi nung iba lungkak aitba mapang nisung ti tashi taküm samaogo aser nisung ti yirua lir.
Lendong adoktsüsa osang prokshiba nungi jenbua alitsü atema state sorkari social networking site tema shibangtsüogo.
Iba lungkak aitba tesem tiyong, Churachandpur nung lungkak aiter telok kati police station ka nung mi senoktsütsü merangdang police temi parnok senshidaktsütsü atema injang yokdang nisung ana kahset.
Lenmang ajak nokdangogo aser lungkak aitertem azüoktsü asoshi Indian Reserve Battalion (IRB) den state police tem jaokogo, ta sorkar ketdangser kati ashi.
Hombar nikongdang ghonda aika lungkak aitdang nisung asem asü aser pongu yirua liasü. Iba mapang garitem nung mi senoktsü aser MLA pongu den health minister Phungzathang Tonsing nunger kitem nun mi senoktsü.
Nisung ana police-i injang akahdang kahset aser MLA tem ki rongtsüba mapang teyariteper ka rongset.
Assembly nung bill tasen kar latetba mapang tatar temi ola madoki agizükba atema onok jashir, ta lungkak aitertemi ashi.
“India temzüng arrla 371 nung Manipur lisopur temeten kümzüka aser wazüka ayutsü shia lir. Ajisüaka tang state bill tasentem nung liso masüba purtem aita state nung kechisarena ajak inyaktettsü aser ali dena alitettsüsa shia lir. Onok state nübur temeten asoshi rarar. MLA temi state lisopur kümzüka meyuteter,” ta lanur lennir kati osangbener dang ashi.
Tang latetba bill tasentem nung tanga state nungi Manipur-i aitettsüsa latettsüba ajanga Manipur nung Naga aser Kuki kintem pei li samatsüsa tensa ka bentsür aruba agi lungkak aittsü tenzük.
1951 küm nungi state nung alirtembo kecha masü saka tanüngertemji tang aliba ali aser senmang ajak toktsütsüsa akümtsü, ta bill tasenba nung shia lir.
Kuki kin ya Myanmar den kidangersa alir aser parnok ya koba mapang ka nungi iba tesem nung arua alitsü tenzükar otsü tejangja mali, anungji bill tasenba ajanga parnok jendoktsü akok.