Kenny Rogers-i temang majungba ajanga Farewell World Tour thinener

Rongchii (April) 06, 2018: Arishi küm 79 country kentener nüngtugu, Kenny Rogers indang tatembangbuba world tour nung anogo 8 nü dang shilem agia kententsü sentong liasü, ajisüaka pa temang mejungi akümba ajanga item sentong thinenogo.
Country kentener, Kenny Rogers-i sangdong ka ajanga doctor tem tetuyuba nung ajemdaker pai tanüngba farewell world tour sentongtem thinener, ta metetdaktsü.
‘The Gambler’, ‘Islands In The Stream’ aser ‘Just Dropped In (To See What Condition My Condition Was In)’ ken atensang, Kenny-i 1950s mapang nungi kentena arur.
Küm asem tejaklen pai, pa tatemsabuba alima sema kentena senzütsü, iba sülenbo pai tatembang arishi anogotemji pa kinüngtsü, Wanda aser chirnur ana den mapang peria indoktsü, ta sangdonga liasü.
Iba tour tembangtsü atema anogo 8 nü dang anünga lia tawa pa temang kanga mejungi akümba ajanga item sentongtem thinener.
Pa indang management-i sangdong ka ajanga, “Pa indang doctor temi pa temang junga akümtsü ta shiaogo, ajisüaka pa temang shia arutsü atema pa sentongtem thinentsü asoshi tuyu,” ta metetdaktsü.
Rogers-ia, “Ni anisüngzüktsü atema ni mapang talangka maginer. Ni iba maongka tajungtiba nung agia tesüiba küm ana tsüngda ni sapurtem den tatembangbuba salem lemsatepa aruogo,” ta metetdaktsü.
“Ni kentena aruba mapang piyon ni ajungshiba aser nungitba atema temeimer ajak dang pelar,” ta paisa shisem.