Tanabuba generation ‘Honda Amaze’, jilia mekaa yutettsü

New Delhi, Rongchii 06 (Agencies): Gari sapurtemi kanga yongya ataa-aliba, Honda Amaze gari generation tanabuba jilia mekaa ayutsü atema Honda cars India-i Rogonü (Friday) agizük tenzükogo.
Iba gari ya linük tesem ajak nung authorized Honda dealerships ajanga sen 21,000 agi meka yutettsü.
Iba generation tanabuba ‘Amaze’ ya platform tasenba nung ajemdaker yangluba den külemi Honda indang advanced engineering prowess aser expertise, research aser development tem ajanga takok ngua yanglutsüogo. 2018 (Monupii) May sayatsü lemtetogo aser gari ya Petrol aser Diesel variant anaprong nung angutsü.
India shishilembadak atema Amaze gari nung diesel CVT technology inoka yangluba ya industry indang mezüngbuba alitsü. Ibaji ajanga gari kanga tashi itdaktsür aser ayonga anishirtetter. Iba Diesel engine den klülemi advanced CVT (Continuously Variable Transmission) meyoktepa yangluba ya Honda indang mezüngbuba diesel gari lir aser iba technology sayatsü atema India shishilembaba ya mezüng alitsü.
Iba gari nungsa convenience features aser safety technology tasentem inoksema yanglutsüogo.
“India nung Honda Amaze ya gari model rongnungi takok ngua yoka aruba den külemi talirtem lakh 2.57 tashi peladaktsüogo. Generation tanabuba model takok ngua bendenlokba ajanga onok kanga pelar,” ta Marketing & Sales, Honda Cars India, sr vice president & director, Rajesh Goel-i ashi.
2013 küm India shishilembabak Honda Amaze mezüngbuba generation sayar külen nungi premium gari ka ama kanga nüngtugu süa aruogo aser lakh 2.57units tashi yokmaogo. Iba gari nung Honda indang technology tajungba tem inokja yangluogo.
Honda Amaze gari yagi award ngua liasü aser iba den külemi nüngtugu ‘Car of the year’ aser ‘Compact-sedan of the year’ award tem nguogo.