Tanü Salman Khan-i bail meshiba ken o angadangtsü

Jodhpur, April 06 (Agencies): Bollywood superstar Salman Khan ano aonung ka tali Jodhpur Central Jail nung amongtsüsa akumtsü, kechiyong pai bail nung chioktsü atema meshiba ken oji Küptoknü (Saturday) ang angadangtsü.
Osangbenertem den jembidang Sessions court Judge Ravindra Kumar Joshi-i, bail atema mepishiba ken oji Rongchii (April) 7 nüang angadangtsü atema paia lemetogo, ta metetdaktsü.
Jodhpur nung osangbenertem den jembidang Salman Khan atema okatsür, Lawyer, Mahesh Bora-i, “Onoki court nung bail atemaji jembitepogo. Tenük kuli alir dak amangtsü madoker. Tenük kuli ka kija nung ajemdaker trail court-i Salman aitsü,” ta ashi.
Küm 20 tejaklen mesü khasetba ken o nung Jodhpur nung aliba court kati Salman Khan aitsüba sülen yashi Bollywood superstar küm pongu tepoukdak ayutsü atema obendang agüja liasü.
Yasüng Salman Khan Jodhpur Central Jail nung mongogo, aser pai bail meshiba ken o angadangtsü liasü, ajsüaka iba ken o angadangtsü atema anogo ka atasülangba ajanga ano aonung ka tali pa jail nung amongtsü.
Rajasthan yimti, Jodhpur nung osangbenertem den jembidang prosecution lawyer Mahipal Bishnoi-i, “Court-i Salman Khan küm 5 tepoukdak ayutsü obendang agutsü aser senchi-a sen 10,000 rupees (dollar 150) chiogo,” ta metetdakja liasü.