Nagaland nungi Kr. Whiso-i FBB colour Miss Femina India nung shilem agitsü

Rongchii (April) 06 nü Kohima nung osangbenertem senden nung Beauty queen ana- Kaheli Chophy aser Ruopfuzhano Whiso na külemi tangokba noksa nung angur.

Kohima, Rongchii (April) 06 (TYO): Miss Nagaland first runner-up, Ruopfuzhano Whiso-i Nagaland tenüng nung taküm June ita nung Mumbai nung FBBcolour Miss Femina India 2018 nung shilem agitsü.
Metsüremi 11, 2018 nü Big Bazaar, City Square, Guwahati, Assam nung Miss India Organisation-i ayongzüka FBB Colours Femina Miss India East Zone audition nung northeast state tem tsüngda tokteptsü atema Beauty and Aesthetics Society of Nagaland (BASN)-i tetsür pongu yoka liasü, ta osang angazüker.
Parnok rongnung Naga tsür Kongru, arishi küm 18, Whiso shimteta FBB Colours Femina Miss India Nagaland 2018 shima liasü.
Tanü Kohima nung aliba Symphony Café nung osangbenertem senden nung jembidang BASN ketdangpurtemi, Indian actress aser nüngtugu model, Pooja Chopra-i Whiso densema East Zone nungi tangartem nem maneni training agutsütsü, ta metetdaktsü.
BASN ketdangpurtemisa, tang Whiso ya project aika nung mazüngi state nung tourism aser sobaliba ajungkettsüdar aser Beauty with a purpose project nunga mazüngi lir, ta metetdaktsü.
FBB Colours Femina Miss India East Zone audition nung lai ajangshibatem lemsatepa Whiso-i, iba tetoktepba kanga tasak liasü aser tanga state tem nungi aika ajangshia aliba tetoktepertem liasü, ta ashi. Whiso-i tawa Little Flower Higher Secondary School, Kohima nungi HSSLC tatidang agutsüogo.
Laisa, ajisüaka ibaji ajanga lai aika angazükogo, aser lenmang nung tetsükdaktsü kechi ajurudir ajuruaka iba nemji mekokdaktsütsü angazükogo, ta shisem.
Whiso-isa, 2017 küm lai Miss Nagaland 1st runner-up jenjang anguba mapang nungi lai aika ajangshiogo aser anogoshia langka tasen angazüktsü jangraba ajanga la taküm kanga melenshiogo, ta ashi.
La modelling ajanga tarutsü nung la tazüngba jenjang nung tetsükdaktsü angutsü asü? ta asüngdangba langzüdang lai, “Ni modeling aser tazüngba naprongla achaayangtettsü,” ta ashi.
Laisa, Femina Miss India 2018 nung sempet sayaba round nung Angami nunger sobaliba ken ka atentsü, ta metetdaktsü.
Osangbenertem senden nungsa taoba mapang FBBcolours Miss India Nagaland, Kaheli Chophy-i, modeling tsütsü tang tashi Nagaland tesülen atsüngzüka lir, ta ashi.
Chophy-ia Whiso nem tesayuba agütsütsü aser lai ashiba agi, küm shia iba tetoktepba ya tasakba-tasakba akumer, kechiyong linük nung tanga tesemtem nungi kanga junga training agir arua tokteper, ta ashi.
Whiso-isa nisung ajak dang la nungittsü aser instagram, twitter aser facebook @ruopfu_whiso aser Ruopfuzhano Whiso nung la ‘follow’ asütsü mepishia metetdaktsü.