Mokokchung nung chiyungtsü tamajung ayoker 4 apu

Dimapur, September 1 (TYO) : September 1, 2015 nü Ao Kaketshir Mungdang (AKM)-i Mokokchung nung chiyungtsü tamajung ayoker tsümar pezü Mokokchung Police Station II ket nung agütsü.
Item nisungtem yagi chiyungtsü tamajungtem ayokba atema Kongrokong Youth-i August 31 nikongtsütsü par pezü apu aser asüngdangya asüba sülen AKM ket nung asüngdangya asütsü atema agütsü, ta AKM tatong tir, Akummeren Longchar aser tongti tezülur, Bendangkumba Aier nati sangdong ka nung metetdaktsü.
AKM-i par pezü dang asüngdangya asüba mapang, parnoki mapang talangka iba mapa inyaka aruba nangzük.
Ano, par pezü rongnungi nisung ana ket nungbo ILP (Inner Line Permit) maliasü.
Parnoki Guwahati nung jenjang dalang agi chiyungtsütem alizüktsü aser itemji bener arur local shishilembartem dang aser public dang ayok ta tsümartem jagi AKM dang nangzük.
AKM-i kanga junga asüngdangya asüba sülen aibelenertem den parnok ket nungi apuba chiyungtsütem Police Station II ket nung agütsü.
Mokokchung nung aliba shishilembartem kanga dang kümdanga alitsüla kechiyong nisungtemi tim masüba inyakyimtem ajanga külakoktsütsü akok, ta AKM mendenpurtemi ashi.
Kongrokong lanurtemi Mokokchung jila nung ozüng alema inyaksangshiba maparen noktangtsü mapa inyakba atema parnok nem tenüngsang agütsür, ta AKM mendenpurtemisa metetdaktsü.