Congress-i tekong merangba ajanga Parliament mekatet: PM

New Delhi, Rongchii (April) 07 (TYO): Parliament House anaprong nung budget senden magitetba atema Ato kilonser, Narendra Modi-i Congress Party aitsüogo.
Ato kilonser, Modi-i, “Congress-i tekong merangba ajanga tan agiba budget senden nung democracy jenjang tamajungba liasü,” ta metetdaktsü.
Paisa BJP MP tem dang opposition-i inyakbaji nüburtem dang jungkai adoka metetdakjang ta mepishia metetdaktsü.
Yashi Modi-i, “Opposition-i senden nung timtem agutsüba aser Ato kilonseri tepela anküp o jembidang timtem agutsüba ama putiotsü nung kodanga matalokdang. Shidakba agibo akhidang nungi opposition-i süngjema angaa atar saka Congress aser parnok pusemertemi timtem agutsüba dang masü saka ni o tejembidak nunga timtem agutsüogo,” ta ashi.
Modi-isa, yimtenren party temi pei jenjang mangateti inyakba dang nungibo democracy tashi taitba, ta metetdaktsütsü atema opposition-i timtem agüjaaka pai ghonda ka onük maneni jembia tembanga jembi, ta ashi.
BJP-i par MP tem dang Rongchii (April) 12 nü peipei constituency nung lumia sarasademtsü ayongzükogo, ano külen Modi-i par MP tem dang opposition MP temi Parliamentary democracy mezüngmeshiba mapatemji nüburtem nem metetdakjang, ta tuyu. Tesülen video ajanga party nung inyakertem den jembidang Modi-i, democratic inyakyim chichia benshiba party ji BJP dang lir, ta ashi.