Tanü AIIMS, Delhi nung Finance Minister Jaitley surgery agitsü

New Delhi, Rongchii (April) 07 (TYO): Asüng (Amongnü) Union Finance minister, Arun Jaitley tezüngjang melen-a surgery agitsü lia tanü AIIMS, Delhi nung pa dak medical tests aika agiogo.
Arishi küm 65, Jaitley yasüng AIIMS-i anir ao, aser iba mapang nungjagi tenzüka yangji temang anepaludar.
Osang ajanga ashiba agi, tezüngjang transplant asütsü anogo ka jelia AIIMS nung anogo ka piyong observation nung ayutsüji medical inyakyim nung lir.
Jaitley ya tezüngjang tashidak agi shiranger aser Tentonü (Hombar) nungi tenzüka pa office-i maor. Pa Rajya Sabha nung tanaben shimshiba sülen ano office tenangzükba-a magi.
Osang ka ajanga ashiba agi Jaitley kidang anepalua liasü aser yashi nikongdang ang All India Institute of Medical Sciences (AIIMS)-i anir oa liasü.
Tezüngjang melentsü atema sentong renemogo aser tezüngjang tenla agutsüba maparen-a ajak tembanga inyakogo.
Jaitley, 10buba India-UK Economic & Financial Dialogue nung adentsü atema taruba hopta London-i aotsü sentong liasü, ajisüaka pa temang majungba ajanga iba sentongjibo thinenogo.
Yashi pai twitter ajanga, “Tezüngjang dak sendakba timtem aser infections ajanga ni temang anepaludar,” ta sangdonga liasü.
AIIMS Director, Randeep Guleria’er adianu aser Apollo hospital nungi nephrologists, Dr Sandeep Guleria ketdangsüba nung pa dak surgery agitsü ta osang angazüker.
Küm aika tejaklena pa dak temelungjang surgery agia liasü.