Israel sepaitemi yirutsüba osangbener süogo

Gaza City, Rongchii 07 (Agencies) : Gaza arrtsülen katepba mapang Israel sepaitemi injang agi yirutsüba Palestine nunger osangbener ka süogo, ta tanü Küptoknü Gaza strip nungi health ministry ajanga metetdaktsüogo.
Yashi raraba mapang Gaza nung aliba Ain Media agency kübok inyaker tenüng agi Yasser Murtaja (photographer) daka injang kahloktsü, ta kasa ministry-isa ashi.
Pa yirur temang anepalua aliba mapang AFP osangbeneri tangokba noksa ka nung Murtaja-ji ‘press’ ta zülua aliba tola ka semer liasü.
Iba tatalokba nung Israel sepaitemi telangzüba agütsütsü memulung saka iba dak sendakba nung reprangshimdagi ta langzü.
Gaza health ministry-isa ashiba agi, ano arishi küm 30 tain nisung ka tenüng agi Hamza Abdel Aal densema süogo; central Gaza kübok Al-Bureij nungi anüdoklen tsütsü lia pa dak injang kahloktsü.
Tenaji dsensema yashi Rogonü nungi tenzüka raraba mapang asür ajak agi par teku jungogo. Hopta ana buba arrtsü nungji nisung meyi aika adenshiba sülen yashi nungi raratep tenzük.
Nangdena akaba gari talungtsütem aika Palestine nungertemi arong aser arrtsü adener aliba Israel nunger sepaitem dak long agi aon anungji parnokia meyiper tenük amba gas aser injang (live) kaloktsü.
Israel sepaitemi injang yokba mapang Palestine nunger 491 yirutsüogo, ta health ministry ajangasa metetdaktsü.