Assam nung nija school tem fee liromedemtsü

Guwahati, Rongchii (April) 7 (Agencies): Assam Assembly-i Rogonü (Hokolbar) nija school tem indang fee liromedemtsü aser aibelenertem dang sen lakh 10 tashi senchi achitsü indang bill ka agizükogo.
Assembly nung The Assam Non-Government Educational Institutions (Regulation of Fees) Bill, 2018 benokba sülen opposition MLA temi temelenshi asütsü onük kar ashiba atema olemtepba aser tatem nung Speaker Hitendra Nath Goswami-i iba bill agizüka ayur ta oshidang agütsü.
Primary, middle, secondary aser higher secondary jenjang nung non-government school mashi ka indang fee structure reprangshimtsü atema sorkari Fee Regulatory Committee ka mesüra talila tentettsü ta iba bill nung shia lir.
Luden nungji sorkari shimba retired district mesüra sessions judge mesüra All India Service nung ketdangser ka lenisüba kübok asütsü. Iba luden nungsa chartered accountant ka, civil engineer ka, private institutes nungi teshimtet nübo ka aser academician ka ta züngsem asütsü atema shimtsü.
Luden nungsa Assam Higher Secondary Education Council & Board of Secondary Education nung Secretary adentsü aser Director of Education-i luden indang coordinator ama inyaktsü, ta bill nungsa shia lir.
Iba luden jagi küm shia academic session metenzükdang nija school tem telemsa balala atema fee indang maximum limits telatetba agütsütsü.
Bill nungsa Fee Revision Committee ka tentettsü aser iba jagi Fee Regulatory Committee-i tetuyuba agütsüba meyipa reprangshitsü ta shia lir.
Fee Revision Committee ji mendenbuba ka lenisüba kübok asütsü aser iba nisungji high court nung retired judge ka asütsü aser sorkari shimtsü.
The Assam Non-Government Educational Institutions (Regulation of Fees) Bill, 2018 sülen manidakba nija school nem temerenshi kar agütsütsü aser item rongnung kaketshir tsüraburtem dang nungi fee agiba anasü meyipa agütsütsü, mezüng aibelenba atema sen lakh 5 senchi achitsü aser tanaben aibelenra sen lakh 10 senchi achitsü telatetbatem lir.
Kasa nija school-i asembenbuba aibelenra ketdangsertemi iba school indang registration mesüra affiliation mesüra NOC agientsü.