Radio angatsü junger

Mapang talangkabo mao, saka küm 40 shi jakdang asen lima nung radio nungi adokba o aser ken angar kanga süngmangtepa liasü, kechiyong asenok tsüraburtemi radio telong nungji nisung tilala pouka yur jembidaktsür mesüra tendaktsür ta bilem. Iba tashi bilemba kolok aser tia nungi tanü asenok küm 40 tsüngda nung memeteti asenok tebilemba aser libaliro tajungba  melenshiogo. Radio sülen küm 30 jakdang asen limai television tonga aru aser tangbo joko mobile phone nung o jembiba dang masü saka internet ajanga facebook aser whatsapp amshi manener. Iba amaji osangtsüsang metetpelaba aser tongtepratep maparen temelaba akümba agi, joko asenok aikati radio amshitsübo amadokogo. Ajisüaka, radio station-bo shibang masü saka tajungba tajungba odagi. Iba jagi tanübo asen lima nunga anogo piyong asen oshi nung radio sentong tapu balala angatsüsa FM nung Mokokchung nungi dena yoker. Atangji, radio nungi yokba osangji tangashidang angashir, anungji television nung noksa dena repranga angaba amato masü, ibayongji nisungtemi radio angatsü mejangrai aküm südi. Ajisüaka, asenoki jungjunga bilemdangra, television-bo television amendakba tesem nung dang reprangtetter, kechiyong tv-bo bener senzütsü makoker, anungji television reprangdang tanga mapa kccha meinyakteti mapang endoktsüsa akümer. Ano, television ka alitsübaji jenjang tasak aser light arudang dang reprangtetter aser ano light atsüker asünungji light bill talila adoktsü aser ita shia cable tv agiba sen agütsütsü. Itemji kodang radio den medemdangdir, radio alitsübo jenjang temela aser osang kisüng angatsübo radio-sa tajungbaa ta angatettsü. Atangji, television reprangbangsa jangratatemba aser tabensaba asütsü akok, anungji mapang alirtem atemabo television reprangtsübajia junger, saka talisa mapang malirtem atema radio amabo masü. Radio-bo bener senzütetter aser mapa inyakmonga angatetter. Ano, tajung kaji mobile phone nunga radio lapoker angatettsü. Talisa, alima lendong menoknok, tzümetsüng aser rara mapangbo tv ajanga osang meyoktettsüa akok saka radio ajangabo yoktettsü. Item tajangzüktemji meteta radio angatsüba ya yimya sübatsüla. Tanü kechiba yangi radio angatsü ajungshir ta süra asenok aika tv reprangtsü mapang mangur aser osangkakettem nung adokba dang nungibo radio osang tekaraba asür. Aji oda, anogo shia alima nung kechi ataloker aser koma jembir itemji asenoksasa meteta anidak nung dang asenoka alima aienba den tsüngkang medema anidaktettsü. Item tongtibangtemji meteta radio station nung ketdangser, inyaker aser osang azüngertemia kanga temulung agüja tajungtiba nung osang tatsük-talem aser shitak agütsütsü merangtsüla. Radio ajanga jembiba ya osangtsüsang sangdongba dang masü saka oshi renlokdaktsür aser nübortem nem tangatetba tajung agüja libaliro melenshidaktsür. Aiben Kohima aser Mokokchung radio station ama nungi asen oshi nung oren osü shitak amshia osang azüngba, sensaksemba  aser kentenmenü sentong metetdaktsüba angadang jangratema nümadangdanga angar. Ajisüaka, ano khenkhen karibo bendangeri Ao oshi junga mashi ser jembir aser azünger amai kitakkitaka azüngba aser jembiba angashidang tezü kanga atanger. Shidi süra radio nung English agi jembirtem ya Kohima station nung jembirtem dang nungibo Mokokchung radio station nung jembirtemi tajungba jembir saka Ao oshi jembidangbo Mokokchung station nung jembir aikati metongmetonga mejembitetter. Itemji melenshidaktsüner. Alu nung asütsüa akok mesüra office aser ki mapa teinyakdak nung asütsüa akok, radio-bo angatsü akoker asünungji, anogo shia radio angatsü mamadaktsüner. Talisa Mokokchung radio station nungi anepdang aser aonung shia osangtsüsang dang masü saka aluyimba aser sobalibaren dak sendakba onüktem tapu balala yoker. Item metettsübaji asenok ajak asoshi kanga tongtibang, anungji asenok ajaki radio angatsüla aser Kohima aser Mokokchung radio station nung inyakertemia temulung agüja inyaktsüla.