Rongchii (April) ita atema Mokokchung DPDB senden amen

Rongchii (April) 07, 2018 nü ADC (Planning) Conference hall nung Mokokchung DPDB Chairman aser Industries & Commerce and NIDC Advisor, Imnatiba-i Mokokchung DPDB senden nung jembiba noksa nung angur. 

Mokokchung, Rongchii/April 09 (TYO): Rongchii (April) ita atema Mokokchung District Planning & Development Board (DPDB) senden ADC (Planning Cell) conference hall nung Rongchii 7, 2018 nü menogo; iba senden ya DPDB Chairman tasenba aser Department of Industries & Commerce and NIDC Advisor, Imnatiba leniba nung mena liasü, ta ketdangsertem osang ka ajanga metetdaktsü.
Senden nung Public Works Department Minister, Tongpang Ozukum aser departments of Law & Justice, Border Affairs and Treasuries & Accounts Advisor, Dr. Longrineken nata aden.
Senden nung jembidang chairman, Imnatiba-i, yimtenren nung pa tang tasen lir aser aika ajangshia mali, ajisüaka pai pa tajungtiba agi inyaktsü jangrar aser nüburtem tenzükba mapa inyaktsü jangraba den district terenlok atema inyaktsü tejangraba lir, ta metetdaktsü.
Paisa, “Ni tang ang tasen. Yashi ang ni yimtenren nung ajemok aser DPDB inyakyim nung tang tasen ajemoker. Ajisüaka nenoki amalitepa inyakba ajanga district nung lenla ajaklen terenlok alitsü atema inyaktettsü,” ta metetdaktsü.
Paisa DPDB züngsemtem dang nungita inyaktsü aser nüburtem nüngdak balala peritsütsü atema shisa tajung lemsateptsü ayongzüka liasü.
Kasa senden nung Minister, Tongpang Ozukum aser Advisor Dr. Longrineken natia district terenlok tsütsü parnok mangdang balala lemsatep.
Tenatisa, Mokokchung district nungi shimba MLA temi senden ka mena terenlok tsütsü jenjang tasen ka alangzüktsü atema longjemer mera agia inyaktsü, ta metetdaktsü.
Mokokchung DC aser Vice Chairman, Sachin Jaiswal IAS-i DPDB chairman tasenba, Imnatiba, Minister, Tongpang Ozukum aser Advisor, Dr Longrineken nunger senden nung pelaa agizüka liasü.
Onük jembidang Sachin Jaiswal-i public services delivery system tajungba akumtsü, district kübok department ajak nung Citizens charter benoka inyaktsü, welfare schemes balala benoka inyakba maparen nung department tsüngda amalitepa inyaktsü aser arrtsülen aliba tesemtem nung terenlok aliba den külemi yimjung atema inyaktsü lemsatep.
Senden nungsa Mokokchung jila nung kanga nüngdaka aliba ring road yanglutsü aser transport bus ajak Khensa nung aliba Inter State Bus Terminal (ISBT) nungi senzütsü atema o lemtepa liasü.
O lemtepba nung shilem agia PWD Minister, Tongpang Ozukum-i, district headquarters ajak nung gari lenmang yanglushiba mapa kanga keraa inyakdar, ta metetdaktsü. Iba dak sendakba nung minister-i iba mapa mapang shidak nung tembanga inyaktsü atema ajaki sorkar den amalitepa inyaktsü ayongzük.
Ao senden Tir, Imliyanger Jamir aser tatong tir, Chubawati nata iba senden nung shilem agia aden aser tenatia district nung kecha tetsükdaktsü makai terenlok mapa inyakettsü atema inyaktsü, ta metetdaktsü.