Assam nung kentener Daniel Langthasa-i Congress nung aden

Guwahati, Rongchii (April) 9 (Agencies): Assam nung Dima Hasao district kübok Haflong nungi kentener aser satirist Daniel Langthasa-i Congress party nung denogo.
Lady Shri Ram college nung kaketshir Gurmehar Kaur-i Facebook nung placards amshia otsü lemsatepba ama yaküm Daniel-ia pa indang Facebook page nung placards 13 amshi pa tebu tepsetba indang osang metetdakja liasü aser iba ajanga pa tali nüngtugu aküm.
Daniel tebuji 2007 küm Dimasa nunger telungpur telok Dima Halam Daogah (DHD)-i tepset.
Arishi küm 32 tain Daniel dang Mr India ta ajar aser pai tanü Haflong nung Congress telok nung aden.
“Ni asüng 11:30 ako meta Haflong nung Indian National Congress nung adentsü” ta pai Facebook post nung osang ka metetdakja liasü.
Yaküm pai social media nung noksa kar sayuba ajanga BJP aser Akhil Bharatiya Vidyarthi Parishad (ABVP)-i pa aitsü.
Daniel Langthasa-i tali bilemloka aoertem, ochimashi, celebrity ashishitep ken o, alima lendong balala aser sorkari takoksa angur asoshi inyakba indang kentem mejema atener.
Pai mejema atenba kentemji ochi nung ajemdaker yanglubatem lir aser asayamenüa keta lir. Tang tashi nung pa indang YouTube channel nung ken 130 shi upload süa lir.
Yaküm pai Haflong nung municipal mapa inyaker 3,000 pusema nungita kentenba ajanga lungkak aitba sentong ka ayonga agi. Municipal mapa inyakertem nem Rongjui (September) 2016 nungi itasen magütsüi aruba atema lungkak aitba sentongji agi.