HPC(D) pur den ‘Homecoming’ sentong Rogonü akatsü

Aizawl, Rongchii 9 (Agencies): Mizoram nung Hmar People’s Convention (Democratic) telungpur bendang agütsüba “homecoming ceremony” sentong Rogonü akatsü asoshi renema lir.
Home department, additional secretary, Lalbiakzama-i ashiba agi, Sesawng yimtsüng nung Mizoram homeguards headquarters, Central Training Institute (CTI) nung iba sentong akadang Hmar nunger telungpur parnok 103 prangbong 48 bener bendanga agütsütsü.
Lalbiakzama-i ashiba agi, Küptoknü HPC(D) telungpurtem ya Mizoram-Manipur arrtsü nung Zilthaw tesem nungi Sesawng-i anir ogo.
Ketdangsertemi ashiba agi, Sesawng nung iba sentong akadang ketdangsertem aika adentsü imlar. Chief minister Lal Thanhawla aser home minister R. Lalzirliana natia iba sentong nung o jembitsü akok aser Hmar nunger lenirtemia lokti ayongzüktsü.
“Deputy army chief” Lalbiaknunga-i anir HPC (D) telungpurtem ya Sakawrdai yimtsüng nung kanga pelashishia agizükogo. Parnok homecoming sentong atema rehearsal asütsü asoshi CTI complex nung anenzüktsü. Sakawrdai ya Sinlung Hills Council (SHC) headquarters asütsü asoshi benokdanga lir.
HPC(D) leniri ashiba agi, parnok bendanga agüja temai adoktetba atema kanga pelar. Iba den külemi paisa iba sentong nung Mizoram adena or aliba Hmar nung lenirtem aika arua adentsü, ta ashi.
Mizoram sorkar aser H. Zosangbera-i aniba HPC (D) pur tsüngda küm 24 tashi tangatettep ka dangi marui kangshia arur Rongchii (April) 2 nü tezüngzüktepba ka yangluogo.
Iba tezüngzüktepba kübok tang aliba Sinlung Hills Development Council (SHDC) koba1997 küm kümtet iba ya state legislature nung act ka pass süa Sinlung Hills Council (SHC) ta melenshitsü.
SHC ya züngsem 14 agi kümtettsü aser lokti nung nütsüng ajema aliba telok nungi züngsem ana nominate asütsü. SHC ya chief executive züngsem ka lenisüba kübok inyaktsü. Iba council ya mezüngbo interim period ama ita trok inyaksangshitsü.