Rahul leniba nung Congress-i BJP sorkar anema longkak ait

New Delhi, Rongchii (April) 09, 2018: Tentonü (Hombarnü) Rajhat, New Delhi nung Congress Party-i ayongzükba lumia longkak aitba sentong nung adentsü atema Congress Party Tir, Rahul Gandhi aruba noksa nung angur. Tanü Rajghat nung Congress lenirtemi linük nung kin kidong nung ajemdaker  Dalit, tribals aser minorty tem anema inyakba aser Parliament mekatetba anema anogo piyong lumia longkak aitogo. Iba dak alia Congress nung inyakertemi state aser peipei district headquarters nung BJP sorkar anema kasa sentong ayongzüka agiogo. 

New Delhi, Rongchii/April 09 (Agencies): Tanü Congress Party Tir, Rahul Gandhi leniba nung party-i Dalit nunger anema inyakba, communalism aser Parliament mekatetba atema BJP sorkar anema linük tesem ajaklen longkak aitogo.
Tanü Raghat nung lumia longkak aiter Congress lenirtem rongnung Kamal Nath, taoba mapang Delhi Chief Minister, Sheila Dikshit, P C Chacko, Delhi Congress unit Tir, Ajay Maken aser Congress otongdar tongti, Randeep Singh Surjewala nunger densema liasü.
Rajghat nung osangbenertem den jembidang Rahul Gandhi-i, Ato kilonser, Narendra Modi-i kin kidong nung ajemdaker inyaker aser pa ya Dalit nunger anemer ka lir, ta aitsü.
Rahul-isa, 2019 küm Lok Sabha election nung par party-i BJP-i aniba NDA teloktep tamakok ngudaktsütsü, ta ashi.
“Ato kilonser Modi ya Dalit nunger anemer ka lir ta linük nübur ajaki meteta lir. Ibaji miim o ka masü. BJP-i Dalits, tribals aser minority tem anema inyaker. Onoki ibaji anema nokdaktsü aser 2019 küm general election nung tamakok ngudaktsütsü,” ta paisa metetdaktsü.
Rahul-i, Ato kilonser Modi aser BJP tangatetbaji linük nung telemsa adokdaktsütsü lir, ta ashi.
BJP ya Dalit nunger anemba party lir, parnoki Dalit aser minority tem jenjang raksatsüner, ta paisa ashi.
1984 küm Sikh nunger anema raraba ken o nung tai tonglokja alir Sajjan Kumar aser Jagdish Tytler na dangbo longkak aitba tongti sabang nung mamentsü tuyua liasü, ta lenirtemi ashi.
Ibaji ajanga Kumar-ibo tejashi nung longkak aitba tesem toktsür ao.
Tesülen osangbenertem den jembidang Congress Delhi unit tongti, Ajay Maken-i, lumia longkak aitba sentong nung sabang nung Congress Tir den party office ketdangpurtem aser taoba mapang minister tem dang amentsü lemteta liasü, ibayongji lenir kar dang sabang toktsür alutsü asüngdang, ta metetdaktsü.
1984 küm October 31nü taoba mapang Ato kilonser, Indira Gandhi tanüker Sikh nunger anati la khasetba sülen Sikh nunger anema rara adokba nung Tytler aser Kumar nati shilem agia lir ta tai tonglokja lir.