CM-i work permit agütsütsü asoshi benokdangba aitsüogo

Shillong, Rongchii 10 (Agencies): Meghalaya chief minister Conrad K. Sangma-i Bangladeshi nunger nem work permit agütsütsü benokdangba lokit tentet balalai aitsüogo.
Tentonü Social Organisations of Meghalaya Against Land Alienation (Somala) puri Conrad-i benokdangba onük ya state-i teyari agüja ozüng alema Bangladeshis nunger Meghalaya state-i anioktsü sentong lir, ta shia iba onük benokra lendong adoktsü, ta amokmerenogo.
Somala nung ya Khasi Students’ Union, Grand Council of Chiefs of Meghalaya, Federation of Khasi States aser Civil Society Women’s Organisation densema lir.
Maneni Bangladeshi nunger nem work permits agütsütsü asoshi benokdangba ya lokti tentet aikati aitsüogo.
Somala convener W. Anthony-i ashiba agi, “Bangladesh nunger nem work permits agütsütsüba ya US aser UK nunger ama developed country tem atema tapet asütsü südi, saka Meghalaya amala state ka kong lisopurtem dena ayanga chiyongtsü asoshi makokba state ka atemabo tapet masü. Mapa angutsü asoshi maongka aikabo mali aser lisopur aser lanurtem aika mapa mangur.”
Iba lokti-i ashiba agi, sorkari Bangladesh nunger nem work permit agütsütsüba tebilemdangba ya toktsür mapa manguba tebilemtsü ya süokia asadangtsüla aser onük tongtibangtiba ka ama agizüka inyaktsüla.
Conrad-i external affairs minister Sushma Swaraj den Rongchii (April) 3 nü ajurutepba mapang nung arrtsü alema bendanger senoka aitba nokdangtsü asoshi Bangladesh nunger nem work permits agütsütsüba benokdanga liasü.
Conrad-i maneni la dang Shillong-Dhaka aser Tura-Dhaka lenmang ajanga Bangladesh aser Meghalaya na tesendaktep tajungba küma yanglushitsütsü asoshi teyari meshia liasü.
Anthony-i ashiba agi, “lokti tentet balalai inner-line permit benoktsüba atema akhangba mapang ka nung lenmang ajanga tesendaktep yangluba ajanga iba tebilemtsü ya mebentettsü. IPL mebenok tashi lenmang yangluba inyakyim ya atasaa alitsüla.”