RMSA-Self defense martial arts training tenzükogo

Dimapur, Rongchii 10 (TYO): Taekwondo nung RMSA self defense martial arts training (2017-18) indang mezüngbuba shilem Tentonü nikongdang nungi IG Stadium, Kohima nung tenzükogo. Iba tesayuba ya Nagaland Taekwondo Association (NTA) ajanga agütsür.
Iba training sayaba sentong nung jembiba mapang, Taekwondo nung self defense martial arts training ajanga agütsüba ajanga tesayurtem nem teyari agütsütsü aser teyari angutsü aser tesayurtemi state nung tanurtem dang sayutsü imlar, ta RMSA Mission Director, Limawabang-i ashi. Pai-sa tesayurtem dang session ajak nung temulung agüja adentsü aser külemi angazüka külemi inyaktsü ajungshi. Tarutsü anogotem nunga Taekwondo nung ‘advance courses’ agitsü akok, anungji iba sentong atema tesayurtem renema alitsüla, ta RMSA Mission Director-isa shisem.
RMSA kübok tesayurtem nem timtem arema training agütsüba asoshi Nagaland Taekwondo Association dang pelar, ta lenir-isa ashi.
State nung school tesayurtem nem Taekwondo asaya indang yimya sayudaktsütsü atema maongka agütsüba asoshi RMSA dang pelar, ta NTA Tir, Pele Khezhie-i iba sentong nung jembidang ashi.
“NTA-i tesayurtem NTA kibong nung züngsem ka ama pelashishia agizüker aser iba ajanga Nagaland nung Taekwondo asaya indang osangbener amai akümtsü,” ta NTA tir-isa ashi.
Iba training nung Kohima, Dimapur, Mokokchung, Peren aser Wokha nungi tesayur 82 tashi arua shilem agir. Tanüngba district tem atema tanabuba shilem training ya Rongchii (April) 18 nungi 22 tashi alitsü, ta ketdangseri metetdaktsü.