Prince Harry-Meghan nati kiyimdang tenla agutsütsü ajungshir

Rongchii (April) 09, 2018: Prince Harry aser Meghan Markle nati tena kiyimba sentong nung tejaokertem dang kiyimba sempet magutsütsü saka tenati sapuba Charity tenet nem tenla agutsütsü atema mepishia metetdaktsüogo.
Arishi küm 33, Prince Harry aser taoba mapang actress arishi küm 36, Meghan Markle na May 19, 2018 nü Windsor Castle nung aliba St George’s nung kibong akumtsü, aser tenati kiyimba sentong nung jaoka alirtem nem charity tentet balala asoshi tenla agutsüdaktsüner.
Kensington palace-i sangdong ka ajanga, ”Prince Harry aser Meghan Markle nati tena aniasüngba sangdongba mapang nungi tena dang temeim tulu sayuba atema pelar aser tenla agutsüba ajanga nisung aika ajangzükdaktsüner,” ta metetdaktsü.
“Iba dak sendakba nung tenati iba anogomong (kiyimba) nung tena dang tepela sayuner ajak dang kiyimba sempet agutsüba dang nungibo charity asoshi dang tenla agutsüdaktsüner,” ta sangdong nungsa shia lir.
”Prince Harry aser Markle nati tenati yarinüba charity tentet tenet shima lir,” ta sangdong nung shia lir.
Item charity denji tena tesendaktep kecha mali saka tenati charity organisations tilatem ang shimogo.
Sangdong nungsa, ”Prince Harry aser Markle na item charities den tesendaktep mali. Loktiliba nung temelenshi atema saisapong, tetsürtem tashi, conservation, environment, ki maliba, HIV aser Armed Forces nung ajemdaker tenati charity tentet tenet shim. Item charity tentet aika tila lir,” ta shia lir.
Charity tentet 7 ji- Children’s HIV Association, Crisis, Myna Mahila Foundation, Scotty’s Little Soldiers, StreetGames, Surfers Against Sewage aser The Wilderness Foundation UK lir.