Mezüngbuba NFNE senden nung sector 5 shimtet

Agartala, Rongchii (April) 10 (Agencies): Sangtennü ‘Niti Forum for North-East’ (NFNE) indang mezüngbuba senden amendang tourism aser food processing dena sector pungu nung temulung agüja inyaktsü lemtet, ta NITI Aayog Vice Chairman Rajiv Kumar-i ashi.
Tang nungi northeast state 8 nem central sector projects atema senotsü 100% agütsütsü. Taoba mapang iba ya Centre-state tsüngda 90:10 telemsa liasü, ta Union Minister for Development of North Eastern Region (DoNER) Jitendra Singh-ia osang metetdaktsü.
“Mezüngbuba senden nung NFNE-i sector pungu mission mode inyakyim nung mapa inyaktsü atema telemtetba agi” ta Rajiv Kumar-isa metetdaktsü.
Tanüngba sector asemji- bamboo, horticulture aser ‘Made in Northeast’ lir aser northeast state tem rongsenkettsüng renlokdaktsütsü atema sector punguji shimtet, ta paisa ashi.
Prime Minister Narendra Modi-i shisatetba ama northeast tesem nung “HIRA” -Highways, Inland Waterways, Railways and Airways tangatetba nung terenlok aser infrastructure indang mapatem inyaktsü, ta paisa shisem.
Modi tetuyuba ama NFNE ya taoba ita tentet aser iba nung NITI Aayog Vice Chairman aser DoNER Minister na Co-Chairmen ama inyaker.
Northeast tesem nung tesüiba küm 65 tashi infrastructure senzüka yutsü saka NDA sorkar kübok iba mapa inyaker. 2014-15 financial year nung sen crore 24,000 agütsüba nung taoba financial year nung sen crore 30,000 ajungkettsü, ta Jitendra Singh-ia ashi.
NFNE senden nung Tripura, Meghalaya, Nagaland, Mizoram, Arunachal Pradesh, Sikkim aser Assam nungi Chief Minister, Deputy Chief Minister, Planning & Coordination, PWD Minister aser tongti ketdangsertem den Central ministries nungi ketdangser aika aden.
Linük nung backward district 115 nungi Northeast state 8 kübok district 14 dena lir. Item tang “aspirational” district ta ajatsü aser kechisarena ajak nung renloktsü atema mapa inyaktsü, ta Rajiv Kumar-i ashi.
District 14 rongnung Assam nung 7 aser tanüngba state 7 nung ka ka dena lir.