Assam sorkari SC nem temepishiba ka agütsütsü

Guwahati, Rongchii 10 (Agencies): VGR (village gazing ground) aser PGR (professional gazing ground) ali tem mamshitsüba atema okadak balala ajanga tenokdangba agüja aliba asadangshitsü atema Assam sorkari Supreme Court dangi temepishiba ka yoktsü asoshi telemtetba agiogo. Iba temepishiba ajanga VGR aser PGR ali amshitsüba atema tenokdangba agütsür aliba agiena tzümetsüng aser anentsü ajanga kongshir ki makai aliba nüburtem jenokdaktsütsü asoshi amshitsü atema mepishitsü.
Amungnü Dibrugarh circle officers tem den lepa reprangshiba senden ka akaba sülen Chief minister Sarbananda Sonowal-i pa indang legal advisor Santanu Bharali dang iba ken o dak sendakba nung jenjang tapet agitsü asoshi tetuyuba agütsüogo. Iba senden nung Sonowal-i ketdangsertem dang parnok kübok aliba alitem magütsü tsüngda jungjunga asadangtsü asoshi tetuyuba agüja liasü, ta sorkar sangdong ka ajanga metetdaktsü. Paisa iba inyakyim nung yimtsüng tekolaktem anisema inyaksangshitsü asoshi tetuyuba agüja liasü.