Kidambi Srikanth World No.1 akümtsü

Rongchii 10, 2018 (Agencies): India nunger nüngtugu badminton asayar Kidambi Srikanth Yangtepnü Denmark nunger Viktor Axelsen melenzüka World No.1 akümtsüba renema lir.
India nunger tebur batmindon asayar rongnungi Srikanth-i iba jenjang ya mezüngbuba tongtetogo. Tetsürtem rongnungi Saina Nehwal-i 2015 küm Metsüremi (March) nung mezüngbuba world No. 1. jenjang tongteta liasü. India tsür asayartem rongnungi Saina-i dang iba jenjang ya tongteta lir.
“Onok iba mapang asoshi kanga yongyaa ataa liasü. Pai yaküm iba jenjang tongtet World No. 1 kümer lila saka yiruba ajanga küm tatemlen asayamungtem nung shilem magiteti liasü. Pai item asayamungtem nung quarterfinals danga tongteta asayatera pa No. 1 kümer lila. Srikanth-i point kecha mongutetaka Axelsen point 1660 samaba ya pa asoshi tajung lir,” ta Sports Authority of India (SAI) nung badminton analyst Md Maqdoom Ahmed-i ashi.
2017 küm Srikanth-i Indonesia, Australia, Denmark aser France ta Super Series titles pezü kokteta iba jenjang ajangteter alima nung badminton asayar rongnung pezübuba küma liasü. Pa Yimpoksüi (November) 2, 2017 nü World No.2 aküm.
World champion Viktor Axelsen-i point 77130 nguteta lir aser pa Malaysian Open nung masayatettsüsa akümba ajanga point 1660 samaa World ranking nung jenjang ka asepzüka aluogo.