Nübortem kümzüka ayutsü atema Aadhaar sendaktepnür: UIDAI

New Delhi, Rongchii (April) 11 (Agencies): Ozüng alema mapa inyakertem ta bilemba agi masü saka nübortem ozüng alema inyakba mapa nungi kümzüka lidaktsütsü atema Aadhaar sendakteper ta UIDAI (Unique Identification Authority of India)-i ashi.
Chief Justice of India Dipak Misra-i aniba Supreme Court Constitution Bench den o toktepdang UIDAI-i iba osang metetdaktsü.
Kechisarena ajak nung Aadhaar sendaktepba ajanga nübortem timtemdaktsür aser senotsü auyaba ken o, kiralongraba aser saru memenokba inyakyimtem sorkari mita reprangba kübok nübor ajak dendaktsür ta UIDAI anema ken o benoka angadangdang iba olen jembi.
“Asenok tayimtsü nung senzür aser passenger ajak temang mita repranger. Temang mita reprangba tetezüji asenok ajak auertem (hijackers) ta masü asenok auertem nungi kümzüka ayutsü atema inyaker” ta Additional Solicitor General Tushar Mehta-i SC bench dang ashi.
Ajisüaka, Justice A.K. Sikri-i “Temang mita reprangbaji senzüsenbongertemi dang ajurur. Nenoki ibaji Aadhaar mapa den medemdangtsü makok, kechiyong Aadhaar maparen nung nisung crore 128 dang pei indang mobile SIM, bank account aser PAN card tem kechi südir süaka Aadhaar card den sendakteptsü meranger” ta Mehta nem o meyiptsü.