Mon district kübok Tammong yimtsüng kümtetogo

Dimapur, Rongchii 12 (TYO): Social Welfare, Home Guard & Civil Defence Advisor, M. Noke Wangnao-i Rongchii (April) 12, 018 anogo Mon district kübok Tammong yimtsüng semzüktsüogo.
Iba yimtsüng semzükba sentong nung jembiba mapang, “Tammong yimtsüng ya anasa aliba yimtsüngtem asoshi tatishitsü tajung aketba yimtsüng ka asütsüla aser yimdaklir temi tzümopung aser temeket tesemtem merikmejua ayutsüla,” ta Noke-i ashi.
Scheme balala liaka yimtsüng ka renloktsübo yimdaklir dak keta lir aser terenlok mapatem sorkar nungi aruaka yimdaklir temi mapa shidak inyaktsüla, ta leniri ashi.
“Yimtsüng ka nung tesem ajunga renloktsü atema yimdaklir longjema alitsü ya kanga tongtibang aser telongjem melira yimtsüng ka tejakleni maotsü,” ta pai ashi. Paisa ketdangsertem dang nüburtem jenjang ajungkettsü mechi mapa shidak aser meranga inyaktsü ajungshi.
Kasa sentong nung Mon indang Deputy Commissioner, K. Thavaseelan, IAS-i jembiba mapang, Rongchii 12 ya Tammong yim asoshi tongtibang anogo ka asütsü, ta ashi.
Yimtsüng ka tim lenmang nung renloktsü asoshi sorkar nungi recognition agitsü ya kanga tongtibang, ta DC-i ashi aser yimtsüng renloktsü asoshi scheme balala inyakyim nung district ketdangsertemi akokba nung yaritsü nangzüktsü. Iba sentong nung Mon yimtsüng nungi Angh tekolakba aser BDO, Y. Tingyeih nungeria jembi.
Iba sentong ya T. Nokyam-i ketdangsüa ani aser Tammong Village Council chairman, N. Monao-i tarur pela agizükba o jembi. Kasa sentong nung Mon yimtsüng nungi tetsür aser tebur cultural troupe ajang tetsü-tebu yimya nung shilem balala agia liasü.
Iba sentong nung tongti tesemdanger meina Fire & Emergency Services, SIRD, Relief & Rehabilitation Advisor, P. Pohwang, ENPO tir, Khoiwang Wangsha nunger den sorkar ketdangser aiba arua aden.
Iba sentong magidang, tongti tesemdangeri nüngshilong ka lapoktsü aser KBBB, Mon Executive Secretary, Rev. Chemyuh Konyak-i sarasadem.