Real aser Munich CL semifinal-i iogo

Rongchii 12, 2018 (Agencies): Rogonü Real Madrid aser Juventus na Champions League quarter-finals asaya nung atakzüka aliba asaya mapang tembangba sülen mapang apulokja asayaba mapang nung Cristiano Ronaldo-i goal ka idaktsüba ajanga parnoki iba asaya goal 3-1 agi mokoka-ka aggregate nung nung semifinal-i iogo.
Taoba hopta quarter-finals asaya mezüngbuba leg Turin nung asayadang Real puri 3-0 agi Juvi madak takok ngur liasü saka Santiago Bernabeu nung tanabuba leg nung Juvi puri kanga junga asayatetogo.
Asaya tenzüker second 76 buba nung Juvi pur atema mezüngbuba goal Mario Mandzukic-i idaktsü aser iba sülen maneni pai half time atongtsüba minute 8 anünga lia tanabuba goal idaktsü. Asaya nung maneni Matuidi-i tasembuba goal idaktsüba sülen score kasasa aküm.
Atakzüka aliba asaya mapang tembangba sülen mapang apuloktsür asayadang minute 97buba nung English referee Michael Oliver-i Real pur nem penalty ka agütsü, koba Ronaldo-i kecha aibelen mesüi idakja parnok iba asaya aggregate nung 4-3 agi kokogo.
Gianluigi Buffon iba asaya densema Champions League nung 125 ben buba asayar liasü aser pa atema iba asaya ya tatembangbuba asütsü akok, ajisüaka penalty agütsüba sülen pai iba telemtetba anema nokdakba atema pa nem red card ka agüja asaya nungi tugudaktsü.
Kasa asayamung tanga quarter final asaya ka nung Bayern Munich aser Sevilla na asayaa liasü. Iba saya nung telok kati danga goal magütsütet, saka mezüngbuba leg nung Bayern puri 2-1 agi koka aliba ajanga parnok semifinal-i iogo.
Bayern Munich puri season 9 nung tang agi tenetbenbuba semi final tongtetogo.
Taküm Champions League nung Real Madrid, Liverpool, Roma aser Bayern-i semifinal tongtetogo aser Rogonü Switzerland nung semifinal atema draw asüba sülen parnok telok koba den semifinal asayatsü aji jangjatsü.