Mkg nung Inter-school badminton championship akar

Mokokchung, Rongchii (April) 12 (TYO): Yangtepnü (Thursday) nungi yangi Indoor Badminton Stadium Mokokchung nung ‘Mokokchung Inter-School Badminton Championship 2018’ ta sür asayamung ka tenzükogo.
Iba asayamung ya ‘Tata Trust’-i achayanga ‘NEIDA’ teloki senotsü teyari agüja Mokokchung District Badminton Association (MDBA)-i ayongzüka akar.
Taküm iba asayamung nung Mokokchung aser temeket tesem balala nungi school 11-i shilem agidar. School-temji; Mayangnokcha GHSS, Straightway School, Jubilee Memorial School, Edith Douglas HSS, Queen Mary HSS, St. Joseph School Khensa, Yajen G.H.S Mopungchuket, Nagaland Christian Residential School (NCRS), Clark Memorial HSS Impur, Chuchuyimpang GHS aser Children School Mokokchung nungertem lir.
Asayatemji; Under- 10, Under-13, Under 15 aser Under 17 ta küma lemsar asayar. Asaya ajak nungji tetsür o tebur na telemsa lir. Iba asayamung ya Rongchii (April) 14 nü tashi asayatsü aser takokertem nem senpet sen den kuli kaket agütsütsü aser overall champion dena alitsü, ta tayongertemi metetdaktsü.
Senotsü tsütsü tsükdakba ajanga Mokokchung nung iba ama Inter-school badminton asayamung ya küm talangka mekateti arur taküm iba ya asentenshia akar, aser taruba küm-a teyarir (sponsor) ngura iba ya maneni ayongzüktsü, ta MDBA ketdangsür kati iba osangbener den jembidang tebilemba ka lemsatep.
Badminton asaya ya jenjang tasak, asayatsü jangraka aser sempet liaka ajakibo matur asünung lanur aika tezüdangadoker, ta paisa timtem ajuruba kar ashi. ‘MDBA-i 2040 nükla yur akokba tashi badminton asayatsü sempet aketer lanurtem anidena sabang agütsütsü merangdaki aser tang asayamung akaba yaa nükla 2040 dak rangloker inyakba maparen ka lir’, ta paisa medenloktsü.
Tanü iba sentong nung Lt. Colonel Shailendra Dhar, Technical Head (EME) H.Q 7 Sector Assam Rifles, tetushi tesemdanger liasü. MDBA tir, Er. Toshi Imsong-i tarurtem agizükba o jembi. NEIDA telok nungia meyonger kati tepela o tatsüka lemsatep.