Bodo nungeri sensaksemtsü asoshi akhanger

Guwahati, Rongchii 12 (Agencies): Bodoland state balaka akhangba telok temi Rogonü Centre dang home minister Rajnath Singh-i nangzükba ama Rongchii (April) 26 tashi nung yimden yimsüsüba tsütsü sensaksem ka akatsü atema parnok jaoktsü asoshi asüngdangogo.
People’s Joint Action Committee for Boroland Movement (PJACBM) kübok lokti tentet 55 lir aser parnoki ashiba agi, Centre-i parnok tenangzükba ama minyakra Rongchii (April) 26 ya tashioktsüba anogo ama amungtsü ta shiogo. Iba sülen Monupii (May) 2 nü nungi tenzüka anogo pongu atema national highway mokdanga ayutsü aser iba den bendenloksema ghonda 36 chakka bandh asütsü.
“Taoba küm Rongchii (April) 26 nü Rajnath Singh lenisüba kübok lokti asem senden ka akaba mapang minister-i sensaksemba ajanga tangatettep ka dangi arutsü asoshi lenmang bushiteter ta shia mapang shia senden akatsü asoshi nangzüka liasü. Anungji onoki iba amala sensaksem ya akatsü imlaa liasü, saka küm ka jungogo aser tang tashi sensaksem khen danga kaa mali. Iba ya Centre-i onok maneni ashioktsüba maparen ka lir,” ta committee sangdong ka ajanga ashi.
All Bodo Students’ Union (Absu) tir Promod Boro-i ashiba agi, 2014 küm Bongaigaon nung rally ka akadang Ato Kilonser Narendra Modi-i Bodo nunger tebilemtsü BJP puri bentettsütsü, ta shia liasü saka iba ken o dak sendakba nung sensaksemtsü asoshi menuba ajanga yimden yimsüsüba tsütsü Bodo nunger temeden kümzüka ayutsü asoshi akhangba bentettsü atema pai nangzükba dak temulung melemi akümer.
Iba lokti tentet yagi Bodo nunger sobaliba aser maitsü wazüka ayutsü mechi nung Bodoland Territorial Areas District (BTAD) aser central aser Upper Assam districts nungi agiteta Bodoland state balaka kümtettsüba atema khanga arudar.
Committee puri ashiba agi, Bodo nunger ya Assam kübok Barak aser Brahmaputra valley nung alirtem lir aser British nungeri Kachari chuba yimli atsüngba sülen 1854 küm Doctrine of Lapse benokba mapang nung India den lokteptsü. Parnokisa ashiba agi, nüjiso anguba sülen Bodo nunger puti otsü raksaogo.
Assam nung Bodo nunger lakh 25 dak tema lir.
Iba lokti tentet yagi Centre dang küm 50 tsüngda nung state tasen aika kümtetaka kechiba Bodoland ka asoshi akhangba ya mataloktsü, ta asüngdang.