Forest Minister Shyamkumar Tangkhul nunger aliba tesemi maitdaktsütsü

Ukhrul, Rongchii 12 (Agencies): Forest department puri süngtsük apuba aser Rongchii (April) 10 nü kecha taitsüba makai chioktsüba atema akhangba ken o dak sendakba nung Tangkhul Frontal Organisation-i Forest Minister Th. Shyamkumar Tangkhul nunger aliba tesemi maitdaktsütsü asoshi telemtetba agiogo.
Iba lokti tentet coordination senden ka Rongchii (April) 10 nü TNL Hall nung kaa liasü, kong züngsemtemi Tangkhul nunger aliba tesem nung forest department-i süngtsük apuba ajang ajanga aitsü.
Iba senden nungsa parnoki Tangkhul nungertemi Th. Shyamkumar parnok aliba tesemi mejaokdaktsütsü asoshi telemtetba agi, aser ashiba agi, Forest Act ya tribal tem aliba tesemtem nungbo mebenoktsüla.
Coordination senden ya Tangkhul Naga Long tir lenisüba kübok aka aser Tangkhul Katamnao Saklong, Tangkhul Shanao Long, Tangkhul Mayar Ngala Long, Tangkhul Naga Wungnao Long, Longphang chairman pezü, All Hunphun Tang Association aser Shirui headman nunger iba senden nung dena liasü.
Temetettsü kaji 2018 Metsüremi (March) nung 43- Phungyar assembly constituency MLA den Manipur forest minister na Phalang yimtsüng nung Kamo Hau benjung nung aden. Iba mapang nung tenadi Phalang yimtsüng ajungbena semdang aser gari dena süng arangtsü bendena aliba aika apu.