Marx, Engels melena Shyamaprasad lenmang, ta melentsüogo

Agartala, Rongchii 12 (Agencies): Chief Minister Biplab Kumar Deb-i Agartala nung Indira Gandhi Memorial (IGM) Hospital anasa Chief Minister kidangi mao tsüngda anogo 7 lia CM’er kidangi aoba lenmang koba Karl Marx aser Friedrick Engels tenüng nung jatsüa liasü, item tenüngtem melenshitsüogo.
Urban Development department sangdong ka ajanga lenmang tenüng melenshiba metetdakja liasü. Tetuyuba agütsüba dak ajemdaker iba lenmang ya ‘Dr. Shyamaprasad Mukherjee Lane’ ta melentsüba, Agartala Municipal Corporation Commissioner Sailewsh Kuymar Yadav-i metetdaktsü.
Osang agitepba mapang nung Yadav-i ashiba agi, lenmang nung English, Bengali, Hindi aser Kokborok oshi agi zülur plaque tasen ka amenokogo. Kokborok ya Tripura nung Borok kin oshi lir.
Transport minister Pranajit Singha Roy, shiba cabinet otongdar lir paia lenmang tenüng melenshiba ya jangjatsüogo. Ajisüaka pai pa station nung mali ta shia osang tejangjabo magütsü.
CPM pur indang Daily Desher Katha ajanga tanü lenmang tenüng melenshiba ya ozüng alema lir, ta shiogo kechiyong iba telemtetba ya municipal body-i agitsüla. Ajisüaka Agartala Municipal Corporation (AMC) Mayor Prafullajit Sinha-i ashiba agi, iba telemtetba ya municipal body kijai agitsü ta kecha temzüng balaka lateta mali. “State sorkari iba telemtetba ya aginera agitettsü,” ta Sinah-i ashi.
BJP state in-charge Sunil Deodhar-i iba telemtetba ya pelashishia agizükogo aser ashiba agi, Marx o Engels nunger tenüng ya India nunger atema mapet aser nüngdak mali. “Communists tem ya nisungtepsetertem, rakzükraktemertem aser nisung tamajungtem lir. Parnoki alima ajunga nung mapa tamajung dang inyaka aruba puti otsü ajanga jangjar. Dr. Shyamaprasad Mukherjee ya lenir tajungka lir,” ya Deodhar-i ashi.
Pradesh Congress tatong tir Tapas De-i kechiba iba lenmang ya taoba chief minister asem; Lal Singha, Nripen Chakraborty aser Manik Sarkar tenüng nung mejatsü shirnok Biplab Deb masüdang CM kidang lia liasü, ta asüngdang.