Nagaland nung Cancer Care Centre lapoktsü atema senden amen

Dimapur, Rongchii (April) 12 (TYO): Nagaland Governor PB Acharya-i acha-ayanga Nagaland nung Tata Trust-i Cancer Care Centre ka lapoktsü atema senden ka menogo.
Rongchii (April) 12, 2018 nü Raj Bhavan Kohima nung Tata trust nungi ketdangsertem, Nagaland Chief Secretary aser Health & Family Welfare Department ketdangsertem senden nung aden.
H&FW Department aser Tata trust nungi ketdangsertem tsüngda Cancer Care Centre lapoktsü indang tebilemba lemsateptsü atema Governor Acharya-i acha-ayanga sendenji ayonga amen, ta Principal Secretary to Governor, Shri Piyush Goyal, IAS-i ashi.
Senden nung Tata Trust nungi Lakshman Sethuraman-i ashiba agi, cancer agi shirangertem temang anepalutsü atema state adena maotsü tangatetba nung iba Centre lapoknür.
Doctor aser nurse temi super specialist nungi tesayuba angazükba sülenbo cancer tashidak 70% nungi 90% tashi anepaluteter. Iba mapatong ya cancer hospital tasen lapoktsü atema masü saka Health & Family Welfare of Nagaland department den yaritepa Nagaland ajungalen cancer care indang mapa inyaktsü atema lir, ta paisa ashi.
Taoba mapang Governor Acharya-i Ratan Tata dang Nagaland nung Advance Cancer Care programme lapoktsü atema shidi ka zülua liasü.
Küm shia Nagaland nung cancer tashidak teimba akümer aser iba jagi Acharya-i Tata Trust dang Nagaland nung advance cancer care unit ka lapoktsü atema tebilemba lemsatep.
Paisa iba onük densema Nagaland chief minister Neiphiu Rio den tanga onük aika lemsatepa liasü aser chief minister-ia iba mapa pela agizük.