Tanela Tanebtsü (T.Ken 105:1-4)

Temang anema alitsü asoshi anogo shia chiyongtsü tatakzük vitamin aliba chiyongtsütem achitsü doctori ashir. Kasaji asenok tanelaren anema alitsü asoshi anogo shia Tsüngrem nüngdakba Dawidi ashir.
Mezüngbuba nüngdakji tenüng asangba. “O Kibuba dang tepela sayuang, aser Pa tenüng nung jajaang… Pa sayatenya mapa ajak indang shiang” (t.1,2). Pa tushiba tetezü Tsüngremi inyakba mapa ajak asoshi Pa tenüng asangba aser Pai asenok den lemsaba ajak asoshi. Tushiba tetezü Kibuba tsüngdang pelatepba kechiaser asenok Pa chirtem lir.
Sarasadem. “Pa tenüng nung jajaang” (t.1). Kodang asenok tashi, taochi aser teyari nungdaker asenoki Kibuba dang ajar. Aser Pai teti asenok dang angashir.
Kuli asübajia tongtipang. “O Kibuba dang tepela sayuang. Nübur rongnung Pa mapatem metetdakjang…” (t.1,2,3). Asenok tetushidang tushir aser sarasadem dang sür tangar dang Kibuba indang melemsatepra, asenok temesü, teladak aser pei atema bilemba taküm ka dang akümtsü. Tangar dang asenoki Paji dang Kümtetdakba lir ta asenoki ashitsü nüngdak.
Tatembangbuba taginübaji Pa jak bushitsüba. “Nenoki Kibuba aser Pa tashi bushiang: maneni Pa tejak bushiang” (t.4). O ka nung, Kibuba tejak tesangwa nung liang. Kibubai ne taküm nung menüremlokja liang aser Pa dang peladaktsütsü bushiang.
Ne temang anema alitsü anebalutsü nüngdakba ama, tanelarena anema alitsü nüngdak. Nai ne tanela timi anebaludar ma? Tsüngremi anogo shia aginüba jagi ne tanela anema aliba nung yaritsü. Anogo shia ne nüngdak tajemtiba metetta liang. Iba jagi Pa pelatsü aser Pa dangi sentsüwangshi bener arutsütsü.