Tripura nung IIIT ka amenoktsü

Agartala, Rongchii 13 (Agencies): State cabinet-i Yangtepnü Mohanpur block kübok Bodhjungnagar tesem nung Indian Institute of Information Technology (IIIT) ka amenoktsüba atema sen crore 50.67 indoktsü atema agizükogo.
Iba institute ya public-private partnership (PPP) model nung 2012 küm amenoktsüba atema telemtetba agi, saka taoba Left Front sorkari fund mechiokba ajanga küm trok tashi kecha minyakteti bangdaka liasü.
Osangbenertem den jembidang education minister Ratan Lal Nath-i ashiba agi, state sorkari kaketshirtem aser mapa mengui aliba lanurtem atema kaketshisatsü bushiba ren nung terenlok bener arutsü asoshi bendanga agüja inyaktsü mulungteter lir. IIIT ya Bodhjunagar tesem nung ali acre 52.08 nung amenoktsü, koba sorkari asadangogo.
“Centre-i linük nung state ajunga nung 2012 küm IIIT kaka amenoktsüba atema telemtetba agi aser Tripura nunga iba institute ya ka amenoktsüba atema temelaba agütsü. Ajisüaka taoba sorkari iba amala project tulu ka atema temulung agüja minyak. Ozü sorkari iba ya tongtibang ta angateta sen crore 50.67 indoktsü asoshi temelaba agütsüogo aser iba nung private partner temi sen crore 5.82 indoktsüba densema lir,” ta Nath-i ashi.
Iba institution ya sen crore 128 indoka amenoktsü aser iba nung Centre-i PPP model kübok sen crore 73.60 agütsütsü aser state sorkari sen crore 44.80 indoktsü aser industrial partner temi sen crore 9.60 indoktsü. Private partners tem rongnung North Eastern Electric Power Corporation Limited aser ONGC puri senotsü indoka yaritsü asoshi mulungogo. Ajisüaka iba project atema maneni private partners tem nungi sen crore 5.82 nüngdaker.
Keno tanga ka nung minister-i ashiba agi, yangtepnü cabinet senden nung Gomati district kübok Udaipur nung Mata Tripurasundari Temple atema trust ka lapoktsüba atema telemtetba agiogo.
Nath-i ashiba agi, iba temple trust tasenba lapokba sülen state nung raliwaliba ren nung terenlok bener arutsü imlar, kechiyong linük nung temple tem ajak trust agi dang inyaksangshir aser item temple tem bendanga agüja amangertem aikati semdangba angur.