Arrtsü nung alirtem atema pass nüngdaker

Aizawl, Rongchii 13 (Agencies): Indo-Myanmar arrtsülen km 16 tsüngda alirtem free-movement zone telung nung senzütsüba atema Centre-i border pass system ka benokogo, ta Lunglei district additional deputy commissioner Benjamin Lalzama-i Rasemnü international arrtsü nung kecha tenokdangba makai senzütsüba atema asadangba senden nung ashi.
India aser Myanmar arrtsü anapronglalen km 16 telungtet nung alirtem visa melei senzütetter aser ghonda 72 tashi arrtsü adener amungtsü melar. Ajisüaka Union home ministry tetuyuba ka ajanga item nisungtem-i arrtsü adentsüba atema border pass ka nüngdaktsü, ta ashiba Lalzama-i iba senden nung metetdaktsü. Iba senden ya Myanmar den arrtsü nung aliba Lunglei district headquarters, Lunglei jila nung kaa liasü.
Iba senden nung police aser Assam Rifles ketdangsertem den, land revenue and settlement aser lokti tentet balala nungi lenirtem dena liasü. Parnoki Lunglei district koba km 16 tasazüki aiter iba tesem nung aliba nüburtem aser litsü asadangtsü asoshi mulungtepa telemtetba agiogo.
Maneni iba senden nungsa parnoki arrtsü nung kecha tenokdangba melei senzütsüba dak sendakba nung home ministry nem osang tejangja agütsütsü asoshi telemtetba agi. Border pass ya Lunglei nung Thingsai police station ajanga agütsütsü.
Mizoram-Myanmar arrtsü dak sendakba nung Zokhawthar yimtsüng Young Mizo Association tir Japan Ralliantawna-i ashiba agi, border pass system ajanga arrtsü nung aliba nüburtem kecha tenokdangba melei senzütsüba nung tetsükdaktsü adoktsü. Paisa ashiba agi, arrtsü anatsülen aliba nüburtem ya sobaliba ajanga sendaktepa aliba agi teti sendaktepa alir.
Taoba küm Indo-Myanmar nung security dak sendakba nung Northeast chief minister tem senden akaba mapang Mizoram chief minister Lal Thanhawla-i, tenokdangba melei senzütettsüba tesem ya km 16 nungi 60-i atsülangtsüla aser linük anapronglai iba tesem nung nüburtem ghonda 72 dang masü saka anogo 60 tashi mungzükdaktsütsü atema melatsüla, ta shia liasü.
Paisa Centre dang Zo nunger den sobaliba tsütsü tesendaktepa aliba maongka ya agia Act East policy nung shilem ka ama iba tesem nung shishilembaba ajungkettsü asoshi asüngdanga liasü.