India atema maaksü

Jammu & Kashmir kübok Kathua nung tebur telok kati arishi küm 8 tain tetsür tanur ka pur anogo ishika tekülem ki ka nung tashiyim agi shi nung medemba sülen tepsetba aser ano Uttar Pradesh kübok Unnao nung arishi küm 18 tain tetsür ka dak tebur telok kati tashiyim agi medemba den ano iba tetsürla tebu tepuokdak lia asüba ken o tem ajanga tanü India lima ajungalen anokshidar. Item tatalokba ya linük asoshi maaksü tulu lir saka maaksü tulutibaji sorkar tashi abenertemi item tesempatsü mapa inyakertem kümzüka ayutsü merangbaji lir. Tang adoka aliba ken o ana ya Bharatiya Janata Party (BJP) sorkar atema tebilemtsü tulu lir aser talisa Prime Minister Modi-i “Beti Bachao, Beti Padhao” (“Save our Girls; Educate our Girls”) yimyim ayimoktsüba den khenyongi meputep. Uttar Pradesh kübok Unnao nung atalokba nung tai tonglokja alirtem rongnung BJP MLA ka dena lir aser külen Jammu & Kashmir kübok Kathua nung atalokba nung Hindu Ekta Manch ta ajaba Hindu nunger telok kati tai tonglokja alirtem pusema sentongtem ayonga agi. Aji dang masü, Jammu & Kashmir sorkar nungi BJP Minister anati Hindu Ekta Manch sentong nung aden aser tenatisa yimjak nung police-i iba ken o bushisüngdangba luja jembiogo. Takoksa ajururtem nem tekaratiba nung temeten agütsütsü melena state anaprong nung tangartemji toktsür sorkar tashi abenertemi aibelenertem kümzüka ayutsü merangbaji kanga dang tesempatsüka lir aser iba jagi India lima sorkar ketdangsübaren nung ochimashi agi amokbanga aliba tali jungkai adoka sayur. Unnao nung tai tonglokja aliba BJP MLA indang tenu den teyaritepertemi tetsürla tebu züka merenshiba aser pa anema ken o benoka pa tepuokdak lia asüba jia taoksatsüka lir. Talisa iba inyakyim ya sentsü malirtem atema tebilemtsü khuret tulu ka lir kechiyong pei metena liaka, sorkar tashi abenertemi odiodia aibelenertem kümzüka ayutsü meranga inyakra, metenabo lir saka sentsü mali ta asürtem ang akoksar anentsü. Anungji, iba inyakyim ya tangatetba shitak aliba senso ajaki aitsütsüla aser anema ola adoktsüla. India nung tetsürtem dak aser talisa tetsür tanur dak tashiyim agi shi nung medemba ya tanü tasen masü saka asenoki mapang shia angashia aruba tebilemtsü ka lir. Kechiba nisungtemi yamai temulung ulua aser metsübui iba mapa inyaker ta süra, asen linük nung ozüng tesashi yanglua maliba ajanga asütsü akok. Anungji, sorkar aser ozüng amertemi iba tebilemtsü ya jungjunga shisadanger, ozüng tesashi kar yanglutsüla aser tang nisung aikati ola adoka akhangba ama tasüba temerenshi agütsütsüsa ozüng tesashi kar yanglu nunga ajungtsü. Yangtepnü (Brihostibar) J&K Chief Minister Mehbooba Mufti-ibo tanur dak tashiyim agi shi nung medemer nem tasüba temerenshi agütsütsü atema ozüng tasen ka yanglutsü ta metetdaktsüogo. Ibaji osang tajung ka lir aser iba ama ozüng tesashi ka yanglu nung dang tarutsü anogotem nung item tatalokba malitsü aser inyaktsü atema temulung moulutsü südi ta bilemer. Kasa onükji Rogonü (Hokolbar) Women and Child Development Union Minister Maneka Gandhi-i jembiogo aser lai tanur dak tashiyim agi shi nung medemertem tasüba temerenshi agütsütsü atema POCSO Act yanglushitsü ta osang ka metetdaktsüogo. Opposition-i anir, telok aser nisung aikati Kathua aser Unnao ken o tem atema Prime Minister Narendra Modi-i ola madokba atema aija aruba sülen Rogonü (Hokolbar) Modi-ia ‘aibelenertem odangbo meyutsütsü aser takoksa angurtem nem temeten agütsütsü’ ta metetdaktsüogo. Ibaji nisung aikati anganüa aliba olen ka lir aser sorkar nung temaba menden nung amener ka ama, Modi lenisüba kübok Centre aser Supreme Court-i tetsür dak tashiyim agi shi nung medemba atema ozüng tesashitem yanglutetra, linük nung temelenshi bener aruba rongnung ibajia ka asütsü.