KTC Football Referee Clinic tembangogo

Kohima, Rongchii 13 (TYO): Kohima Town Club (KTC)-i state nung football referee tem ajungmesotsü nükjidong nung Rongchii (April) 7, 2018 nungi tenzüka anogo trok tashi KTC Football Referee Clinic ayongba yashi (Yangtepnü) Khuociezie Kohima Local Ground nung tembangogo.
Iba clinic tembangba sentong ka agiba mapang KTC tir, Dr. Viketuolie Pienyii-i tejangraba tulu nung shilem agirtem aser tesayur anati jenjang tajungtiba nung tesayuba agütsüba asoshi pelaba metetdaktsü.
Iba clinic ya tang ang tenzüker aser KTC ajanga maneni iba ama sentong tajungtiba nung football referee tem asoshi ayongzüka akatsü, ta Pienyii-i ashi.
Iba referee clinic ya aruya aliba Kohima Football League (KFL) dak rangloker ayongzük ta KTC tir-isa ashi. Paisa maneni referee tem dang temang anema alitsü aser football asaya yimya den teti rangloka alitsü mechi pei aliba tesem nung football asaya ayongzüka agitsü ajungshi aser KFL nung KTC-i parnok nübu amshitsüsa football asaya ayongzüktsü, ta shisem.
All India Football Federation instructor, M. Joy Chandra, shiba iba clinic nung instructor liasü, pai KTC dang iba ama maongka agütsüba asoshi pelar, ta ashi.
Chandra-isa iba clinic nung shilem agirtem dang akmesen melie tangazükbatem amshitsü aser medemertem dena lemsateptsü ajungshi.
Referee ka akümtsü asoshi temang anema aliba ya tongtibangtiba lir anungji temang anema alitsüla, ta paisa ashi.
ISL nung North East United nungi asayatsü asoshi tawa shimsang, Naga nunger Kivi Sumi den adishitepa jembidang, referee lanurtem dang teti practice süa mapa meranga inyakba ajanga dang national referee akümtsü aser referee taintemi state nung football asayamung ayongzüka akatsüla, ta shisem.
FIFA rules nung aliba ama Chandra-i iba clinic nung practical aser theory ajak sayu. Iba clinic mapang pa den teyariteper aser par medemer, Train Kumar, All Manipur Football Association nungi arua liasü.
“Joy lenisüba kübok onok kanga pelateba yimya aika angazükogo,” ta football asayar tejen aser Mokokchung nungi school education department nung inyaker, Arentemjen-ia ashi.
“Onoki iba clinic nung angazükba yimyatem amshitsü aser onok tejakleni aotsü,” ta iba clinic nung adener tetesürtem rongnungi jembidang State IG Sport Academy, Riileizou, Kohima nungi Vizovonuo Sano-ia ashi.
Iba clinic nung referee tetsür 5 aser tebur 19-i shilem agi.