Monupii 8 tashi Sri Lanka Tiri parliament anentsür

Colombo, Rongchii 13 (Agencies) : Sri Lanka Tir, Maithripala Sirisena aser Ato Kilonser na tsüngda yimten tashi atsütepba mapang ka nung ajungbena dang yasüng (Yangtepnü) ayatrem nungi taruba ita Monüpii (May) 8 nü tashiji Tiri parliament anenja lir.
Linük Temzüng Arrla 70 nung ajemdaker Yangtepnü ayatrem nungi parliament senden kecha malitsü atema Tiri shiogo, ta sorkari ozüng züngzüktsüogo.
Cabinet kilonsertem par trok densema Sirisena nungiter ter troki mepetmesü aliba coalition sorkar toktsütsü ta metetdaktsür ghonda ti sülen tang iba telemtetba osang sangdonger.
TSüklai (February) ita nung agiba local council elections nung telok anaprongi tamakok anguba sülen unity government nung telok balala ana tsüngda tesendaktep mejungi aküm ta angazüker.
Ato Kilonser Ranil Wickremesinghe-i aniba United National Party (UNP) teloki Sirisena tsütsü alirtem kanga rongshia arur kechiaser Wickremesinghe yimsüsüba nung temulung alem/malem tendanga tawa vote agütsütepba mapang parnoki pa anema vote enoktsü.
Taruba Yangtepnüji ano Parliament senden amentsü ta teimla tulu nung liasü; iba dak sendakba nung presidential official-temi telangzüba agütsütsü memulung.
“Iba osang sangdongba angashia onok aoksar,” ta AFP osang den jembidang tatar kati metetdaktsü.
Parliament anentsüba osang pai sangdongtsü mapang tatsüka dang lia Cabinet menden tazüng asoshi Sirisena-i acting minister-tem shimtet.
Sirisena tsütsü aliba kilonsertemi nungita joint opposition purtemi taoba hopta nungto Wickremesinghe dak temulung malemba onük benok saka paisa (Wickremesinghe) takok angu, ta kasa osang ajanga metetdaktsü.