Punjabi kentener Parmish Verma yirutsü

Mohali, Rongchii (April) 14 (Agencies): Rogonü (Hokolbar) aonung tesü mejangjatetba nisung kari Mohali nung Punjab nunger nüngtugu kentener Parmish Verma dak injang khaloktsü.
Iba lendong nung Verma tepi nung injang agi yiru aser pa Fortis hospital nung anioka anepaludar.
Iba tatalokba atema ozüng alema inyaker Dilpreet Singh-i pa indang Facebook page nung tenüng agiba metetdaktsüogo.
Pai Verma dak injang khaloktsü ya Dilpreet-i ashi aser police-i nisung tepsettsü merangba ken o ka mejangjatetba nisungtem anema benoka bushisüngdang tenzükogo.
Dilpreet ya nisung tepsetba aser tepsettsü merangba ken o aika nung tai tonglokja aputsü bushir. Chandigarh nung aliba Chandigarh nung nisung ka tepsetba ken o nunga pa dak tai tonglokja lir.
Parnoki iba tatalokba atema bushisüngdang ka tenzükogo aser CCTV footage reprangdangdar ta Mohali SSP Kuldeep Singh Chahal-i osangbener dang ashi.
“District police nung Cyber expert temi Facebook nung post upload asüba metettsü atema mapa inyakdar. Iba ya chichiba osang asü mesüra police-i bushisüngdang asüba nung timtem agütsütsü atema osang sangdongba’ar onoki kuli bushidar” ta paisa ashi.
Kentener Parmish-i ‘Gaal Nahin Kadhnai’ ken atenba ajanga khen nung nüngtugu aküm.