BJP lennirtemi Ambedkar kürakyanglu menentsüba merüktet

Vadodara, Rongchii (April) 14 (Agencies): B R Ambedkar sor küm 127 ajungba anogomung nung Union minister Maneka Gandhi aser BJP lennir kari Ambedkar indang kürakyanglu nung naro enokja tetushi agütsüba sülen Dalit nungertemi Küptoknü (Honibar) iba kürakyanglu shidoka merüktet.
BJP lennirtemi marudang parnok mezüng B R Ambedkar indang kürakyanglu alidak adenshi, ta Employees Union of Maharaja Sayajirao University of Baroda SC/ST general secretary, Thakor Solanki-i osangbener dang ashi.
Dalit nungertemi Race Course nung aliba GEB Circle tesem nung tanga party lennirtem aser Maneka Gandhi nunger anema yimyim ayima lungkak ait. Women and Child Development minister Maneka ji Vadodara nung sentong ka nung adentsü atema aruba liasü.
BJP MP Ranjanben Bhatt, city mayor Bharat Dangar, BJP MLA Yogesh Patel aser tangartem den Maneka nungertem Ambedkar indnag kürakyanglu alidaki aru aser idangji Solanki-i anir Dalit nungertemi yimyim ayimtsü tenzük. Iba mapang Dalit nunger aser police tsüngda mangatettep adok saka lendongbo kecha matalok.
Maneka Gandhi aser tanga lennirtemi tanep 9:00 ako meta kürakyanglu nung naro enokja tetushi agütsüba sülen Dalit nungertemi kürakyangluji mamatzü aser tzü agi merükteta shidok.
“Onoki police dang onok BJP lennirtem den mezüng tesem tonga aru anungji onoki mezüng naro enokja tetushi agütsütsüla ta ashi. Ajisüaka, police-i onok noktang aser ibaji inyakyim nung aliba ama lir aser mayor indang temeten lir ta ashi. Iba jagi ozü züngsemtem ain adokdaktsü” ta Solanki-isa osangbener dang ashi.
“Maneka Gandhi aser tanga BJP lennirtem aruba ajanga kürakyanglu aser GEB circle tesem menentsü. Anungji BJP lennirtemi naro enoktsüba sülen onoki mamatzü aser tzü agi Ambedkar indang kürakyanglu merüktet” ta paisa shisem.
Maneka iba tesemi marudang Dalit nungertemisa SC/ST cell of BJP state unit general secretary, Jivraj Chauhan meindok.