Wadang takok ngua tembangogo : Trump

Washington, Rongchii 14 (Agencies) : Nükjidong nung rangloker inyakba ama wadang takok ngua tembangogo, ta anünglen nungi Syria nung temulung malem bilemba tesemtem amakba sülen US Tir, Donald Trump-i metetdaktsüogo.
Syria Tir, Bashar al-Assad-i chemical amshia amakba agi jashir anünglen nungi Syria anema mang ayangtsü asoshi Trump-i ozüng agütsü.
Syria nungeri chemical amshia pei nübur anema raraba nungi nokdangtsü mechi France aser Britain den longjemer Syria amaktsü ozüng agütsü, ta Trump-isa nenshia ashi.
Nütsüng nüburtem alidak masü saka chemcial oset yangludak aser item oset bendena ayuba tesemtem nung anünglen nungi bomb agüja linük asem longjemer amak.
“Yimten tashi amer pa mulungka agi Syria lima yimsü asüsang, Bashar al-Assad-i amshiba chemical osettem yua lir ta bilemba teshimtet tesemtem nung dang indang-indanga amaktsü asoshi ni United States Armed Forces nem ozüng agütsü,” ta White House nungi television ajanga jembidang Trump-i metetdaktsü.
US Tiri ashiba agi, ‘chemical weapons’ amshiba, yangluba, ayimsünga tangaleni yokba anema kanga sashia nokdakba temaitsü linük asem longjemer iba maparen inyak.
Telongjem linük asem sepaitemi amakdang Syria nung chemical osettem yangluba tesem poksatsüba sülen, “Wadang takok ngua tembangogo,” ta Trump-i sangdongogo.
“Kanga junga makdokogo. France aser United Kingdom naprong dang kanga pelar; nenoki shisatsü tamshi shia amshiogo aser nenok sepai tashi tulu aliba sayuogo. Iba dang ya tajungbabo meinyaktettsü. Wadang takok ngua tembangogo,” ta Trump-isa tanü Twitter ajanga metetdaktsü.
Ano Congressman Vern Buchanan-i ashiba agi US, British aser French sepaitem longjemer Syria amakba ya Assad-i alima ajungai nokdangba ‘chemical weapons’ amshiba langzüa inyak.
“Iba ya ajanga par lima kasa nübur tsüngda raraba nungbo shilem magitsüji tongtibang mesüra Russia nungeria par sepai tashi amshidi ta asütsüsa parnoka mejashidaktsütsüla,” ta paisa tekümdangtsü olen ka shisem.
Aji oda süaka, Senate Foreign Relations Committee nungi Senator Cory Booker-i ashiba agibo Trump-i asalentong kecha meyanglui dang amaktsü atema sepaitem nem ozüng agütsüba mesüra US Congress nungi nüngdakba temelaba magii inyakbaji kanga dang khuret süa bilemer.
Tang Syria anema apusoba tashiyim maparenji ajanga region nung tebilemtsü bener arutsütsü, ta tanga osang ka nung Iran nungeria tekümdangtsü olen ka metetdaktsüogo.
Ano Syria sorkar anema raraba telungpurtemi ashiba agi, Assad-i maneni linük yimsü asüba manen tashi anüolen tsütsü aliba kintemi amak yonga kecha balaka masütsü.