Power department ajanga Costumer Care Centre commission süogo

Tovihoto-i CCC dangi iba centre commission sür mezüngbuba complaint call asüba mapang tangokba noksa nung angur.

Dimapur, Rongchii 14 (TYO): Electricity atsükertemi timtem balala ajuruba lemsateptsü asoshi ketdangsertem dangi tsüngdong aotsüba nung anisüngzük bener aruja, Küptoknü Power department ajanga Burma Camp, Dimapur nung Customer Care Centre (CCC) ka commission süogo. Iba centre ya Advisor, Power aser DPDB Dimapur mendenpuba, H Tovihoto Ayemi-i semzüktsüba mapang helpline number 1912 nung pai mezüng complaint call süogo.
Ibai Government of India indang Restructured Accelerated Power Development & Reforms Programme (R-APDRP) kübok amenokba lir.
Iba centre ya power atsükertemi teyari meshiba/ashishiba mapang tatsütiba nung inyaktsütsü nükjidong nung amenok.
Nagaland nungi Dimapur, Chumukedima, Kohima, Wokha, Phek, Mokokchung, Mon, Tuensang aser Zunheboto district tem ya sen crore 24.5 indoka iba R-APDRP amenoktsü shimtet.
Tang nungibo power consumer temi kidang mener electricity dak sendakba complaint tem ya angadi jembiba number 1912 nung agütsütettsü. Electricity consumer temi complaint agütsüba mapang electricity consumer number agütsütsüla.
Income aser revenue timba kümdaktsütsü asoshi tentet ka nung customer service ajanga tongtibang shilem agir aser iba nungji ajemdaker asenoki customer service metsünga reta amshitsüla, ta Tovihoto-i iba centre commission asüba mapang ashi.
Dimapur nung aliba CCC ajanga Dimapur aser Nagaland tesem ajunga nung power atsüker indang tangatetba melenshitsü imlar, ta paisa ashi.
State nung power aliba azüokteta saru saruba nunga terenlok lir. CCC nungi customer service tajungba agütsüba ajanga power department indang saru saruba nunga renloktsü, ta Power department indang Advisor-isa ashi.
Paisa yimten yimsüsür tem dang power auyaba, ozüng alema hooking amshiba aser aibelenertem mita reprangtsü ajungshi aser nüburtem dang CFL aser LED bulb amala energy efficient electric bulb amshitsü ajungshi.
Telephone, IVR system, email, Fax/letters ajanga complaint agütsüba agizüktsü asoshi CCC ya centralized computerized system kong technology tasenba aser customer service representative (CSR) training agir lir, aser customer temi iba centre-i tsüngdonga arutettsü, ta Additional CE (D&R) & Nodal Officer, R-APDRP, Er. Keviletuo Yiese-i iba kasa sentong nung metetdaktsü.