Modi-i Ayushman Bharat Scheme kübok mezüngbuba health centre lapoktsü

Bijapur, Rongchii (April) 14 (Agencies): Prime Minister Narendra Modi-i Küptoknü (Honibar) Ayushman Bharat Scheme kübok mezüngbuba health centre lapoktsüogo.
Iba health centre ji Chhattisgarh kübok Bijapur nung pai lapoktsü aser iba mapang Modi-isa Bastar Internet scheme indang mezüngbuba shilem tenzüktsü.
India nunger Prime Minister kati lisopurtem aliba Bijapur district mezüng semdangbaji Modi lir aser tanü paisa Gudum o Bhanupratapur tsüngda rail line aser passenger train lapoktsü.
Taküm küm tatemlen Chhattisgarh nung election agitsü lir aser prime minister-i tang agi pezübenbuba atema iba state semdanger asütsü.
Modi-i Monupii (May) 2015 nung Dantewada semdang, Tsüklai (February) 2016 nung Naya Raipur aser Rajnandgaon aser Yimpoksüii (November) 2016 nung Naya Raipur semdanga liasü.
Tanü pai yimtsüng tenet nung bank kongsangtem lapoktsü aser India BPO promotion scheme kübok yangluba rural BPO centre ka semdang.
Prime minister-isa Chhattisgarh nung gari lenmang aser aputem yanglutsü atema sen crore 1,700 shi alang mapatongtem inyaktsü atema lungtem azünga ayutsü.
Dalit nunger lennir B R Ambedkar tasoba anogo den külemi Modi-i tanü Chhattisgarh semdanga liasü.
Iba sentong nung mendenji Chhattisgarh Chief Minister Raman Singh liasü aser tongti tesemdangerji Health Minister J P Nadda liasü.
Ayushman Bharat Scheme kübok Centre sorkari 2022 matongdang health & wellness centre lakh 1.5 shi lapoktsü alizüng ayur.
Iba scheme küboksa sorkari National Health Protection Scheme (NHPS) yanglushiogo aser beneficiaries o hospital entitlement lemtettsü atema mapa inyakdar.