Tamajung anema apusoba

Jammu & Kashmir aser Uttar Pradesh nungi tenzüka tesem balala nung tawa mapang tatsüka tsüngda tetsür tanur tila dak tena tashiyim agi mapa tamajung inyakba mapatem anema yakanü India tesem balala nung nisung aikati pei nüngdak mapatem ajak toktsür shilem agibaji linük ajungtsü asoshi tenlaba mapa ka asütsü. Atangji, Nagaland nunga Dimapur aser Ghaspani nung kasa sentong nung nisung karibo shilem agiogo. Iba jagi asen lima nunga mapa tamajung anema ola adokba terabo angashidaktsüogo. India nung tetsürtem anema tashiyim agi mapa tamajung inyaka taküm raksatsürtemji aiben yimsüsürtem mesüra parnok kinungertem asür. Iba jagi police-temi parnok anemaji ken o mebenoktetter. Ano, tanü asüng atalokba mapa karbo tamangba yimsü balala tsüngda kati ka anemtepba tsütsülen nungi mezüngmeshia tsübudaktsütsü atema tetsürtem pua bener oa tamajung inyakba putetter. Ano, shisabolutsükaji, ozüng anema mapa tamajung inyakertemji government nung alir yimten telok nungitertem süra ozüng raksartemjiang government-i kümzüktsü meranger. Tanü asenoki alima ajungtsü atema jembiaka majungbaji tamajunger kümzüktsü merangba ajanga lir. Alima ajungtsü atemabo kinunger pi mali, shitakji shitak aser taiji tai asütsüla. Ibaji meteta asenok Aor sobaliba nungbo, yimdong nung tanurtem raratepba nung, shiba tai aser shiba shitak kecha mali, raratepbaji tai, anungji pei tanur tama merenshir. Iba kasaji mapa inyakdak pei kinungertem dangang mapa nung tezümedangji ochishia meranga inyaktsü ajungshir. Iba tangatetba nung linük ajaklen ozüng raksartem anema shitak nokdaktetra, mapang tatsüka tsüngda ozüng raksar mali kümadoktsü. Tanü asen lima jungnüseta majungba tashidak kaji, asenoki tamajung anema ola adoktsü asoshibo kima tashia maluner. Ano, ozüng raksasangji pei kinunger, pei yimer, pei party pur aser pei-i yariba yimsüsür süra kenyongi mangu aser mangashi amato yutsür. Iba jagi tamajung inyakertem temulung ulur. Ibaji tarutsü loktiliba asoshi kanga lendong lir. Tanübo nisung tamajung purtem kari tashiyim agi pua bener oa mapa tamajung inyaker tepseta yutsüla aiür chanulaji nür jala mesüra neyi- nenu masütsüa akok, ibayongji nai shishia mebilemer mesüra mejashir asütsü. Asen dak mekongshi nungji asenoki tangar lendongi aiba, maksü anguba aser takoksa tia ajurubaji kecha hau ta mali, tamajung anema yimdongdak ghonda ka lokti nung oagi shilem agitsübajia azümasener.Tamajung mapatem anema yimdong nung oagi nokdaktsü agibo kidang dang ayongayonga kazüner. Iba jagi, asen lima nung balaka, ozüng raksaba aser nübortem anema ochimashi mapatem inyakba anema apusotsü ayongzükyonga shingaia ola madoktsü, maotsü aser madentsü. Iba jagi tamajung inyaktsü ajungshir amato akümer aser tamajung inyaktsü bilemertemi marendaki tamajung mapa inyaker. Pei lima ajungtsü asoshi nisung ajaki mapa tulu meinyaktettsü mesüra tenlaa tulu magütsütettsü, saka kodangsa tashiyim, ochimashi aser tamajung anema apusotsü ayimoktsüdir, ibaji pei lima kümzüktsü asoshi arrsangoktsür amai bilema shilem agitsü menungnangtsüla. Tangar tajangshir aser tashitemetettertemi ashi ama, alima ya tashiyim agi mapa tamajung inyakertemi raksar masü saka nisung tajungertemi mapa tamajung inyakba anema ola madoki yutsüba ajanga tashiyim mapa tamajungtem menokdangtet atalokpet ataloker. Iba tangatetba nung, pei tetsü tasolima tashiyim mapa tamajung inyakbatem nungi kümzüka ayutsü asoshi senso ajaki ochimashi aser mapa tamajung anema apusotsüla. Asenok yariba yimsüsür mesüra aseni meimba adianu katiang tashiyim mapa tamajungji inyaktsüa akok, idangji tamajung purtem kümzüktsü memerangi tamajungertemjiang ozüngi melaba ama merenshidaktsütsü merangra, iba jagiang tamajungertemjia melenshitsü aser alimaa tajungba akümtsü. Iba amaji, asenoki tamajung mapatem anema indangindanga apusora, tamajung mapa inyaktsü ajaki arendaktsü, anungji meinyaktsü. Idangjiang, tetsür tanurtema pei lima nung tetsübu makai alitsü.