Indigenous Left youth lenir anogo 5 lir külen sür lia ngutetogo

Agartala, Rongchii 17 (Agencies): Amarpur sub-division kübok Govindabari Kumar ADC yimtsüng nungi arishi küm 27 tain Ajenda Reang anogo pongu tejakdang samaba sülen tanep arem ka nung süngzü agi aletseta sür lia ngutetogo.
Osang agitepba mapang nung Sub-Divisional Police Officer (Amarpur) Souvik Dey-i ashiba agi, Ajendra ya par kidang nungi km 8 shi pilar Brahmaniya Kuyri tesem nung aliba arem ka nung süngtong ka nungi sangzüa lia ngutetogo. Pa ya pa indang motorcycle den külemi anogo pongushi samara bushia liasü. Süng akor temi pa tasümang tanep ngutet aser Birganj police station nung osang agütsü.
Ketdangserisa ashiba agi pa samara aliba mapang nung pa indang mobile phone nungi call aiben aruogo. Phone asüsang yagi pa Ajendra ta shia teyari meshia liasü.
“Onoki pa Khowai district kübok Mungiakami tesem aser Gomati district kübok Jatanbari aser Karbook tesem nung aiben bushiogo,” ta SDPO-i ashi. Tasümang ya tanep ngutetba sülen post mortem atema yokogo.
Iba ken o dak sendakba nung pa tebilemba asüngdang dang SDPO Dey-i ashiba agi, bushisüngdang ajanga iba ya suseta asüba ken o ka amai reprangteter. Ajisüaka post mortem osang aruba sülen osang tejangja metettsü, ta paisa ashi.
Kasa mapang nung Ajendra tebu Dharmajoy Reang-i ashiba agi, par jabaso ya tepseter alena toktsü. “Pa temang ajunga nung tarak tanak aliba nguogo, koba azükba ajanga adokba lir. Pa temang ya süngtong nung alener doktsü,” ta Dharmajoy-i ashi.
Ajendra ya Tribal Youth Federation (TYF), South Amarpur Local committee secretary liasü. Iba lokti ya CPM youth wing – Democratic Youth Federation of India (DYFI) kübok inyaksangshir.
CPM state secretary Bijan Dhar-i, Ajendra ya yimden yimsüsüba dak sendakba nung tepsetba lir ta shia iba ken o kanga junga bushisüngdangtsü asoshi akhang.
Dhar-i ashiba agi, taoba mapang nung yimden yimsüsüba dak sendakba nung tepsetba ken o ana tashi suseta asüba ta shia mimbangtsüogo aser tang iba ken o ya kanga junga asadangtsü asoshi khangogo.
BJP puri iba ken o nung parnok kecha sendaka mali ta shiogo aser suseta asüba ka tepsetba ama kümdaktsüba ya CPM pur yimya lir, ta ashi.
Iba ita tetenzüklen CPM lenir Rakesh Dhar-a South Tripura district kübok Shantirbazaar nung sür lia ngutet aser pa yaa süseta asü ta police temi metetdaktsü.