Lanur 5-i tetsür ka tashiyim agi raksatsü

Agartala, Rongchii 17 (Agencies): Linük nung tang Asifa tashiyim agi raksaja tepsetba onük kanga bulua jembiba mapang ka nung India tesem balala nungi iba amala mesükba ken o aika angazüka arudar aser tang Tripura nung arishi küm 16 tetsürchanu ka tebur pongui tashiyim agi raksatsüba ken o adokogo.
Osang ajanga ashiba agi, Rongchii (April) 15 aonung state ajunga nung Bengali nunger küm tasen benjungmung amungba mapang nung tetsürchanula ya tution temer kidangi meyipa aoba mapang nung jail quarter anasa Akon-Bakon tesem nung asangur parnok pongui la pua bener taoba mapang jail nung inyaka alir asür ka kidangi anir tua indakji la dak tashiyim mapa inyak.
Rongchii (April) 16 anepdang tashi la meyipa maruba ajanga tsüraburtem shisabulua police nem la samaba osang agütsü.
Ken o benokba sülen Dharmangar Police temi la bushi tenzük. Police station nung jail quarters nung alir kari Rongchii 15 aonung mejangjaba lanur kar iba kidang yagi tuya angu, ta osang agütsüba sülen police tem iba tesem yagi aritepa ao aser abelena alirtem pua tetsürchanula ya kümzük.
Iba dak sendakba nung tashiyim amshir parnok pongu prongla ya police temi puogo.
“Onoki Mh Mustifa Ahmed (22), Amar Hossain (24), Riaz Uddin (19), Mh Kalim Uddin (22) aser Mana Mia (21) puogo. Parnok ket nungi auoyaba bike asem ngutetogo. Dharmanagar Women Police Station-isa section 366 (A)/ 511/376/341-IPC kübok taoba mapang jail nung inyaka alisang Purnabasi Debbarma kinungtsü anema ken o ka benokogo, kong tashiyim mapa ya inyaka liasü,” ta Dharmanagar Police Station nung police ketdangser kati ashi.