Senapati nung tang mezüngbuba cabenit senden kaogo

Imphal, Rongchii 17 (Agencies): Tentonü Senapati district headquarters nung tang mezüngbuba cabinet senden kaogo.
Information and public relations minister aser sorkar odongdar Th. Biswajit-i ashiba agi, cabinet senden nung parnoki government school nung azünger kaketshirtem shirnok High School Leaving Certificate aser Higher Secondary Leaving Certificate tatidang nung temaba jenjang nung pass südir parnok nem senpet agütsütsü lemtet.
“Government school nung azünger kaketshirt shirnoki iba tatidang ana nung mezüngbuba, tanabuba aser tasembuba jenjang nung takok ngudir parnok nem sen lakh, 5, 4 aser 3 ta agütsütsü aser jenjang 4 buba nungi 25 tashi nung takok angurnem sen lakh 1 agütsütsü,” Biswajit-i ashi.
State cabinet-i ano Jawaharlal Nehru Institute of Medical Sciences (JNIMS) nung post tazüng alibatem süngdaktsütsü asoshi telemtetba agi.
Iba den külemi cabinet-i state nung investigative units for crime against women (IUCAW) ana lapoktsüba atema telemtetba agiogo.
Parnoki maneni Manipur Police Service nung mapa tazüng aliba süngdaktsütsü asoshi lemtet. Taoba mapang police recruitment inyakyim nung timtem aliba bushisüngdangertemi ngutetba sülen state sorkari taoba recruitment process athitsü asoshi telemtetba agia liasü.
Cabinet-isa Ukhrul district nung Shangshak police station kübok Lambui police outpost yanglutsüba atema ali indang indanga alitsüba atema temelaba agütsüogo.
Public prosecution tashi itshitsü atema cabinet-i directorate of prosecution nung post tazüng aliba süngdaktsütsü asoshi telemtetba agi. Parnoki direct recruitment asütsüba nokdanger aliba dena khen atema aginogo.
Manipur Conservation of Paddy Land and Wetland Act, 2014, Section 2 (n) kübok petrol pumps aser LPG godowns tem ya nüburtem atema asütsü, ta cabinet-i agizükogo, ta Biswajit-i ashi.
Maneni cabenit-i school züngtur anener aliba kaketshirtem atema scheme ka benoktsü asoshi telemtetba agiogo. Iba scheme tasenba kübok class IX nungi XII tashi nung züngtur anener kaketshirtem nem compulsory education agütsütsü asoshi sorkari takok tashi inyaktsü, ta Biswajit-isa shisem.