Tetsür tanur ka dak tashiyim agi shi nung medemer tepset

Etah (Uttar Pradesh), Rongchii (April) 17 (Agencies): Uttar Pradesh kübok Etah nung tanep arishi küm 7 tain tetsür tanur ka dak tashiyim agi shi nung medemba sülen tepset.
Kiyimba sentong ka nung süki enoktsü atema jaokba nisung kati tanutsüla dak iba mapaji inyak.
Iba tatalokba atema tejashi nung tanutsülar kinungertemi tanü Etah-Farrukhabad lenmang mokdanger lungkak ait aser külen opposition party temi Yogi Adityanath’er sorkar aitsür.
Uttar Pradesh nung tetsürtem dak tashiyim mapa inyakba kanga bulua atalokba atema nisungtemi Yogi Adityanath’er sorkar aitsüba mapang ka nung tanüa iba lendong atalokogo.
Tanep 1.30 ako meta Mandi Samiti gate anasa lendongji atalok. Tanutsülaji lar kibong den kiyimba sentong ka nung adentsü atema aoba liasü, ta police-i ashi.
Kiyimba sentong atema Sonu Jatav (19) ta ser nisung ka nem süki renemtsü mapa lemzüktsü. Pai tanutsüla dak tashiyim agi shi nung medemba sülen la tepset, ta Superintendent of Police Akhilesh Chaurasia-i ashi.
Sonu ji yim agi leter liasü aser iba tatalokba sülen pa jena ao. Kiyimba sentong agiba anasa ki tesüto ka nung tanutsüla indang mangji angu. La tekong nung süngzü ka aleneta liasü, ta paisa shisem.
Tanutsülaji mozü kidang anir ao saka pa süadoker liasü. La mang post-mortem asütsü atema bener ogo, ta Akhilesh-isa metetdaktsü.
“Tanutsülar kinungertemi ashiba nung ajemdaker police-i Sonu Jatav apu. Pa anema POCSO Act densema ken o ka benokogo” ta paisa shisem.
Uttar Pradesh nung BJP sorkar akümba sülen kechiba yamai tensa mejungi aküm ni mangateter, ta Samajwadi Party otongdar aser MLC Sunil Singh Sajan-i ashi.
“Sorkari ozüng alema inyakertem khaseter ta ashir saka ano külenbo ozüng alema mapa inyakba teimba kümogo. BJP-i sorkar kümli UP nung tensa tajungba aküm ta nangzük saka tanü tatalokbatem reprangdangra, UP state nung tetsür tanurtem kümzüka mali ta bilemer” ta paisa metetdaktsü.
“Asen state nung ozüng alema inyakertemi yamai sademsadema senzüba angudang temulung raksar. Tetsürtem dak tashiyim mapa inyakba den tanga ozüng alema mapa inyakbatem nung UP state mezüngbuba jenjang nung lir. State nung ozüng alema mapa inyakba anema Congress-i kobi melii lokti sentong ka tenzüktsü” ta UP Congress otongdar Ashok Singh-ia metetdaktsü.
Ajisüaka, BJP-i ozüng alema inyakertem kümzüka mayur ta metetdaktsüogo.
“Taoba state sorkartem mapang ama BJP-i ozüng alema inyakertem kümzüka mayur. UP nung police-i shinga tetuyuba kübok meinyaker. Taoba sorkartem mapang FIRs tem benoktsü makokbatem tangbo khen nung benokteter” ta BJP-i ashi.